આણંદની અમૂલ ડેરી દ્વારા યુદ્ધના કારણે વધતા ખર્ચ વચ્ચે પણ દૂધના ખરીદ ભાવમાં પ્રતિકિલો ફેટના રૂપિયા ૧૦ નો વધારો
અમૂલ દ્વારા હંમેશા પશુપાલકોના હિતને ધ્યાનમાં રાખી લેવાયેલો નિર્ણય : ચેરમેન
આણંદ, ત્રણ જિલ્લાને સાંકળતી આણંદ સ્થિત અમૂલ ડેરી દ્વારા પશુપાલકો પાસેથી ખરીદવામાં આવતા દૂધના ભાવમાં આગામી પહેલી જૂન ૨૦૨૬થી પ્રતિ કિલો ફેટમાં ૧૦ નો વધારો કરવામાં આવ્યો છે.અમુલ ડેરીના ચેરમેન શાભેસિંહ પરમારે જણાવ્યું કે, હાલની વૈશ્વિક પરિસ્થિતિ સમગ્ર વિશ્વના ઉદ્યોગ અને વેપાર માટે અનુકૂળ નથી. મધ્ય પૂર્વમાં ચાલી રહેલા સતત યુદ્ધના કારણે તેલ આધારિત દેશો તેમજ વિવિધ ઉદ્યોગોના વ્યવસાય પર ગંભીર દબાણ ઊભું થયું છે. જેથી ડેરી ઉદ્યોગ પણ અસરગ્રસ્ત થયો છે.
જેથી નિયામક મંડળ દ્વારા દૂધ ઉત્પાદકોને આગામી પહેલી જૂનથી દૂધના ખરીદ ભાવમાં પ્રતિ કિલો ફેટ રૂપિયા ૧૦ નો વધારો આપવામાં આવશે. તેમણે વધુમાં જણાવ્યું કે, આ યુદ્ધના કારણે, ડેરી કામગીરી પર પડેલા કેટલાક પ્રભાવથી પરિસ્થિતિ કેટલી ગંભીર છે તે સમજાશે. LPG દરમાં, LDO(લાઈટ ડીઝલ ઓઇલ) માં, પેકિંગ મટિરિયલ ફિલ્મમાં, CBXમાં અન્ય વપરાશની સામગ્રીના ખર્ચમાં નોંધપાત્ર વધારો થયો છે.ડીઝલના ભાવમાં વધારાના કારણે પરિવહન ખર્ચમાં પણ ખૂબ વધારો થયો છે. બીજીતરફ પશુઆહારના કાચા માલના ભાવમાં ગયા વર્ષની સરખામણીએ અંદાજિત બમણો વધારો થયો છે. આ તમામ પડકારો અને વધતા ખર્ચ વચ્ચે પણ અમૂલ ડેરી હંમેશા પશુપાલકોના હિતને પ્રથમ સ્થાન આપે છે.
આમ આ દૂધના ખરીદ ભાવમાં હવે પ્રતિકિલો ફેટે રૂપિયા ૮૬૫ થી વધારી ૮૭૫ આપવામાં આવશે. આ વધારાના કારણે ૬.૦૦% ફેટવાળા ભેંસ દૂધના પ્રતિ લિટર ભાવમાં રૂ.૦.૬૧ નો વધારો થઈ રૂ.૫૪.૦૫ પ્રતિ લિટર તથા ૭.૦૦% ફેટવાળા દૂધના પ્રતિ લિટર ભાવમાં રૂ.૦.૭૨ નો વધારો થઈ રૂ.૬૩.૦૬ પ્રતિ લિટર થશે. તે જ રીતે ગાય દૂધના ખરીદી ભાવમાં પણ વધારો કરવામાં આવ્યો છે.તા.૦૧.૦૬.૨૦૨૫ ના રોજ રૂ.૩૮૪.૧૦ ના ભાવે ખરીદાતું ગાય દૂધ હવે તા.૦૧.૦૬.૨૦૨૬ થી રૂ.૩૮૮.૬૫ પ્રતિ કિલો થશે. જ્યારે સમતુલ્ય ફેટના ભાવે ખરીદવામાં આવશે.
એટલે કે ગાય દૂધના કિલો સમતુલ્ય ફેટના ભાવમાં રૂ.૪.૫૫ નો વધારો કરવામાં આવ્યો છે. આ વધારાના કારણે ૩.૫૦% ફેટવાળા ગાય દૂધના પ્રતિ લિટર ભાવમાં રૂ.૦.૪૩ નો વધારો થઈ રૂ.૩૬.૬૮ પ્રતિ લિટર તથા ૪.૦૦% ફેટવાળા ગાય દૂધના પ્રતિ લિટર ભાવમાં રૂ.૦.૪૫ નો વધારો થઈ રૂ.૩૮.૬૮ પ્રતિ લિટર થશે.આ સાથે જ નાણાંકીય વર્ષ ૨૦૨૫-૨૬ માટે પ્રતિ કિલો ફેટનો અંતિમ ભાવ રૂ.૧૦૩૫ જાહેર કરવામાં આવે છે.
આ દર અમૂલના ઇતિહાસમાં સર્વાેચ્ચ છે અને સાથે સાથે ગુજરાતના તમામ દૂધ સંઘો તેમજ સમગ્ર ભારતના દૂધ ક્ષેત્રમાં પણ સર્વાેચ્ચ દરોમાંનો એક છે. ગુણવત્તાસભર પશુવંશ વિકાસ, વધુ દૂધ ઉત્પાદન અને પશુપાલકોની આવકમાં વધારો કરવાનો પ્રયાસ વધુ મજબૂત બન્યો છે. અમૂલ ડેરી હંમેશા ખેડૂતો અને પશુપાલકોના આર્થિક સશક્તિકરણ માટે પ્રતિબદ્ધ રહી છે અને ભવિષ્યમાં પણ આ દિશામાં સતત કાર્ય કરતી રહેશે.SS1
