વરિષ્ઠ નાગરિકો,બાળકો અને દિવ્યાંગજનોની સુરક્ષાને કેન્દ્રમાં રાખીને વિશેષ કામગીરી
અમદાવાદ (પ્રતિનિધિ), અમદાવાદ શહેરમાં નાગરિકોની સુરક્ષા, પદયાત્રીઓના સંરક્ષણ, ફૂટપાથ પર થતા વાહન અતિક્રમણને અટકાવવા તેમજ ટ્રાફિક વ્યવસ્થાને વધુ સુવ્યવસ્થિત અને સુરક્ષિત બનાવવા માટે અમદાવાદ મ્યુનિસિપલ કોર્પોરેશન દ્વારા શહેરભરમાં ફૂટપાથ અને મુખ્ય માર્ગો પર સેફ્ટી રેલિંગ અને ગ્રિલ સ્થાપિત કરવાની વ્યાપક કામગીરી હાથ ધરવામાં આવી રહી છે.
AMCની કોમ્પ્રિહેન્સિવ પોલિસીમાં આ કામગીરીને રોડ સેફ્ટી અને નાગરિક સુરક્ષા માટેના મહત્વપૂર્ણ ઈન્ફ્રાસ્ટ્રક્ચર ઘટક તરીકે સમાવેશ કરવામાં આવ્યો છે. AMC દ્વારા શહેરના મુખ્ય જંકશનોના પુનર્વિકાસ કાર્ય અમલમાં મૂકવામાં આવી રહ્યા છે, જેમાં પદયાત્રીઓની સુરક્ષા, ટ્રાફિકની સરળ અવરજવર, રેઇઝ્ડ ફૂટપાથ, બોલાર્ડ, ટ્રાફિક આઇલેન્ડ અને સેફ્ટી રેલિંગ જેવી સુવિધાઓનો સમાવેશ કરવામાં આવ્યો છે.
પોલિસી મુજબ પદયાત્રીઓ માટેના વિસ્તારોમાં વાહનોનું અતિક્રમણ અટકાવવા અને વાહનો ફૂટપાથ પર ચડી ન જાય તે માટે સેફ્ટી રેલિંગ સ્થાપિત કરવામાં આવશે. તેમજ હાઇ-સ્પીડ હાઇવે, બ્રિજ અને અકસ્માતવાળા વિસ્તારોમાં સેફ્ટી રેલિંગ તથા ક્રેશ બેરિયર્સ પણ ઉભા કરવામાં આવશે. મુખ્ય માર્ગો, હાઇ-સ્પીડ કોરિડોર, જોખમી રોડ સ્ટ્રેચ અને અકસ્માતપ્રવણ વિસ્તારોમાં રોડસાઇડ પ્રોટેક્ટિવ બેરિયર્સ સ્થાપિત કરી જાહેર સુરક્ષા વધારવાનો ઉદ્દેશ્ય છે.
AMCની કોમ્પ્રિહેન્સિવ પોલિસી અંતર્ગત શહેરના સાત ઝોનમાં કુલ 90 માર્ગો પર ગ્રિલ અને રેલિંગ સ્થાપિત કરવાની યોજના છે. તેમાં પશ્ચિમ ઝોનમાં સૌથી વધુ 35 રસ્તાઓ, દક્ષિણ પશ્ચિમ ઝોનમાં 10 રસ્તાઓ, દક્ષિણ ઝોનમાં 13 રસ્તાઓ,ઉત્તર પશ્ચિમ ઝોનમાં 7 રસ્તાઓ, ઉત્તર ઝોનમાં 12 રસ્તાઓ, મધ્ય ઝોનમાં 5 રસ્તાઓ તથા પૂર્વ ઝોનમાં 8 રસ્તાઓનો સમાવેશ થાય છે. તે અંતર્ગત જોધપુર વોર્ડમાં રિદ્ધિ ટાવર પાસે 100 મીટરની લંબાઈની રેલિંગની કામગીરી પૂર્ણ કરવામાં આવી છે.
જયારે જોધપુર વોર્ડમાં જ લોટસ સ્કૂલ પાસે 50 મીટરની લંબાઈની રેલિંગ લગાવી દેવાઈ છે. આ ઉપરાંત અન્ય સાત ઝોનમાં હજુ રેલિંગ લગાવવાની કામગીરી અમલમાં મુકવાના આયોજનમાં છે. જેમાં પશ્ચિમ ઝોનમાં કામેશ્વર મહાદેવ મંદિર સામેનો રોડ, મકરબા એસ.પી. રિંગ રોડ, પારસમણી એપાર્ટમેન્ટથી આઈ.ઓ.સી. પેટ્રોલ પંપ સુધીનો માર્ગ, શાસ્ત્રીનગરથી વરદાન ટાવર સુધીનો માર્ગ, સી.જી. રોડ, આશ્રમ રોડ, આઈ.આઈ.એમ. હેલ્મેટ રોડ,
કોમર્સ છ રસ્તાથી સી.એન. સર્કલ સુધીનો માર્ગ, સ્ટેડિયમ પાંચ રસ્તાથી સરદારના બાવળા સુધીનો માર્ગ, મીઠાખળી સર્કલ વિસ્તાર, સાબરમતી રેલવે સ્ટેશનથી ચાંદખેડા સર્કલ સુધીનો માર્ગ, મોટેરા સાઈ મંદિરથી કોબા મેટ્રો સ્ટેશન સુધીનો માર્ગ અને વિસત સર્કલથી ટોલ નાકા સુધીના વિસ્તારો સહિતના મુખ્ય માર્ગો પર રેલિંગ અને ગ્રિલ સ્થાપિત કરવામાં આવશે. તેમજ દક્ષિણ પશ્ચિમ તથા દક્ષિણ ઝોનમાં પડલાવ નગર, ડી-માર્ટ વિસ્તાર, જીવરાજ પાર્ક ચાર રસ્તા, ગીતા મંદિર ચાર રસ્તા, પરશુરામ ચાર રસ્તા, શાહ આલમ વિસ્તાર, ગોમતીપુર, અમરાઈવાડી, નારોલવાસ રોડ, વાટવા વિસ્તાર તેમજ અન્ય સંવેદનશીલ માર્ગો પર રેલિંગ અને સુરક્ષા માળખું ઉભું કરવામાં આવશે.
તેમજ ઉત્તર પશ્ચિમ ઝોનમાં મેમનગર ચાર રસ્તાથી સંજીવની હોસ્પિટલ સુધીનો માર્ગ, વસ્ત્રાપુર તળાવ ફ્રન્ટ, ગુરુકુલ રોડ, ધનવન્તરી ચાર રસ્તા વિસ્તાર તથા આર.ટી.ઓ. ટેકનિકલ કમ્પાઉન્ડ સર્કલ સુધીના વિસ્તારોનો સમાવેશ થાય છે. ઉત્તર ઝોનમાં ઠક્કરનગર એપ્રોચ, AMTS બસ સ્ટેન્ડથી નરોડા ગામ ચાર રસ્તા, ધનુષ્યધારીનગર રોડ, જહાંગીરપુરા પુલ, બાપુનગર ચાર રસ્તા વિસ્તાર,
મહુડી કોટન રોડ, બાપા સીતારામ ચોક રોડ તથા ગોયાળા સર્કલથી એરપોર્ટ સુધીના માર્ગો પર પણ રેલિંગ સ્થાપિત કરવાની કામગીરી હાથ ધરાશે. પૂર્વ ઝોનમાં વિરાટનગર વિસ્તાર, મણીનગર રોડ, વિરાટ ચાર રસ્તા, ગુજરાજ ચાર રસ્તા, સી.ટી.એમ. ચાર રસ્તા, રખિયાલ પુલ, રખિયાલ વિસ્તાર અને રામોલ પોલીસ ચોકી વિસ્તારમાં પણ ગ્રિલ અને રેલિંગ સ્થાપિત કરવામાં આવશે. આમ સાત ઝોનમાં 90 જેટલા માર્ગો ઉપર ગ્રિલ અને રેલિંગની કામગીરી શરુ કરવામાં આવશે.
મ્યુનિસિપલ કોર્પોરેશન દ્વારા શરુ કરેલી આ સમગ્ર કામગીરીનો મુખ્ય ઉદ્દેશ્ય નાગરિકોની સુરક્ષા વધારવો, પદયાત્રીઓ માટે સુરક્ષિત અને અવરોધમુક્ત ફૂટપાથ ઉપલબ્ધ કરાવવો, વાહન અતિક્રમણમાં ઘટાડો કરવો અને શહેરમાં વધુ સુવ્યવસ્થિત તથા સુરક્ષિત ટ્રાફિક વ્યવસ્થા સુનિશ્ચિત કરવો છે.
AMCની “નોન-મોટરાઇઝ્ડ ટ્રાન્સપોર્ટ ઈન્ફ્રાસ્ટ્રક્ચર” હેઠળની જોગવાઈ અનુસાર ફૂટપાથ પર વાહનોનું દબાણ અટકાવવા, જોખમી રીતે રસ્તો ક્રોસ કરવાની પ્રવૃત્તિઓને નિરોત્સાહિત કરવા તથા તમામ નાગરિકો માટે સુરક્ષિત ચાલવા લાયક પરિસ્થિતિ ઉભી કરવા માટે શહેરના વિવિધ વિસ્તારોમાં સેફ્ટી રેલિંગ સ્થાપિત કરવામાં આવશે.
