આ બ્રિજ પૂર્ણ થયા બાદ એસ.જી. હાઈવે તેમજ વેજલપુર કોર્પોરેટ રોડ પર રોજિંદા ટ્રાફિક સમસ્યામાં રાહત મળશે -AMC દ્વારા કુલ ૧૨ સ્ટીલ કોમ્પોઝિટ ગર્ડર લોન્ચિંગની મહત્વપૂર્ણ કામગીરી સફળતાપૂર્વક પૂર્ણ કરવામાં આવી હતી.
(પ્રતિનિધિ) અમદાવાદ, અમદાવાદ શહેરમાં ઇન્ફ્રાસ્ટ્રક્ચર વિકાસને વધુ ગતિ આપવા માટે અમદાવાદ મ્યુનિસિપલ કોર્પોરેશન દ્વારા મકરબા બ્રિજની કામગીરી ઝડપભેર આગળ ધપાવવામાં આવી રહી છે. હાલમાં મકરબા બ્રિજની કામગીરી ચાલી રહી છે, જેમાં તા. ૧૮ મે ૨૦૨૬ના રોજ રેલવે વિભાગ દ્વારા રેલવે ટ્રાફિક બ્લોક આપવામાં આવ્યો હતો.
આ દરમિયાન એએમસી દ્વારા કુલ ૧૨ સ્ટીલ કોમ્પોઝિટ ગર્ડર લોન્ચિંગની મહત્વપૂર્ણ કામગીરી સફળતાપૂર્વક પૂર્ણ કરવામાં આવી હતી. એએમસીના ઇજનેર વિભાગ દ્વારા રેલવે વિભાગ સાથે સંકલન કરીને આ કામગીરી સમયસર પૂર્ણ કરવામાં આવી છે. આ બ્રિજ પર ગર્ડર લોન્ચિંગ પૂર્ણ થવાથી હવે આગામી તબક્કાની કામગીરીને પણ ગતિ મળશે.
ખાસ કરીને પશ્ચિમ અમદાવાદના મકરબા, વેજલપુર કોર્પોરેટ રોડ અને એસ.જી. હાઈવે વિસ્તાર વચ્ચેની કનેક્ટિવિટી વધુ સુગમ બનવાની આશા વ્યક્ત કરવામાં આવી રહી છે. આ બ્રિજ પૂર્ણ થયા બાદ એસ.જી. હાઈવે તેમજ વેજલપુર કોર્પોરેટ રોડ પર રોજિંદા ટ્રાફિક સમસ્યામાં રાહત મળશે અને વાહનચાલકોને વધુ સરળ તથા ઝડપી અવરજવરનો લાભ મળશે.
અંદાજિત એક લાખથી વધુ નાગરિકોને આ પ્રોજેક્ટનો સીધો લાભ મળશે. હાલમાં રેલવે ફાટક પર લાંબા સમય સુધી વાહનો સાથે રાહ જોવી પડતી હોવાથી ટ્રાફિક જામની સ્થિતિ સર્જાતી હતી, પરંતુ બ્રિજ કાર્યરત બન્યા બાદ આ સમસ્યામાં નોંધપાત્ર ઘટાડો થવાની શક્યતા છે. તેના પરિણામે વાહનચાલકોનો કિંમતી સમય બચશે તેમજ ફાટક પર લાંબા સમય સુધી વાહનો ઊભા રહેતા થતા ઇંધણના બિનજરૂરી વપરાશમાં પણ ઘટાડો થશે.
શહેરના વધતા ટ્રાફિકને ધ્યાનમાં રાખીને એએમસી દ્વારા હાથ ધરવામાં આવી રહેલા આવા આધુનિક ઇન્ફ્રાસ્ટ્રક્ચર પ્રોજેક્ટો ભવિષ્યમાં શહેરની ટ્રાફિક વ્યવસ્થાને વધુ કાર્યક્ષમ, ઝડપી અને સુવ્યવસ્થિત બનાવવામાં મહત્વપૂર્ણ સાબિત થશે.
