શોપિંગ મોલ, હોટલ, થિયેટર, હોસ્પિટલ સહિતના વ્યાવસાયિક એકમોને યોજનાનો લાભ મળશે
(પ્રતિનિધિ) અમદાવાદ, અમદાવાદ મ્યુનિસિપલ કોર્પોરેશન દ્વારા શહેરમાં ટ્રાફિકની સમસ્યા દૂર કરવા ખાસ પહેલ કરવામાં આવી છે. શહેરમાં આવેલા કોમર્શિયલ એકમો પોતાની પાર્કિંગની જગ્યા નાગરિકોને મફત ઉપયોગ માટે ઉપલબ્ધ કરાવશે તેમને પાર્કિંગ માટે ઉપલબ્ધ કરાવવામાં આવેલા ક્ષેત્રફળ પુરતી પ્રોપર્ટી ટેક્સમાં વેરામાફીનો લાભ આપવામાં
અમદાવાદ શહેરમાં અનેક જગ્યાએ કોમર્શિયલ એકમો આવેલા છે જોકે મોટાભાગના કોમર્શિયલ એકમોમાં પાર્કિંગની જ સુવિધા ઉપલબ્ધ નથી. મોટાભાગના પાર્કિંગો ગેરકાયદેસર છે અને તેમાં યોગ્ય પાર્કિંગ પણ થતું નથી.
જે કોમર્શિયલ કોમ્પ્લેક્સમાં પાર્કિંગની જ સુવિધા ઉપલબ્ધ નથી અને તેમને જ બીજી જગ્યાએ અથવા તો રોડ ઉપર પાર્કિંગ કરવા પડે છે ત્યારે બીજા લોકોને મફતમાં પાર્કિંગ કરાવવા માટે જગ્યા આપવાની વાત કરીને પ્રોપર્ટી ટેક્સમાં વેરા માફીનો લાભ આપવાની જાહેરાત કરીને કોર્પોરેશન હવે પાર્કિંગ મામલે આડેધડ નિર્ણય લઈ રહ્યું હોય તેવું સામે આવ્યું છે.
શહેરમાં અનેક કોમર્શિયલ કોમ્પ્લેક્સોમાં પાર્કિંગ યોગ્ય રીતે કરવામાં આવતું નથી લોકો રોડ ઉપર જ પાર્કિંગ કરે છે પાર્કિંગ હોવા છતાં પણ રોડ ઉપર વાહન પાર્કિંગ થાય છે અને તેને મ્યુનિસિપલ કોર્પોરેશન દૂર કરાવી શકતું નથી ત્યારે હવે કોમર્શિયલ કોમ્પ્લેક્સોમા પાર્કિંગ માટે માફી વેરાની જાહેરાત કરવામાં આવી છે. પાર્કિંગ હોવા છતાં પણ અનેક જગ્યાએ વાહનો પાર્ક કરવામાં આવતા નથી.
અમદાવાદ મ્યુનિસિપલ કોર્પોરેશન મુજબ નાગરિકોને ખાનગી પાર્કિંગની સુવિધા ઉપલબ્ધ થશે, તો રસ્તાઓ પર થતા વાહનોના પાર્કિંગમાં ઘટાડો થશે અને શહેરમાં ટ્રાફિક દબાણ ઓછું કરવામાં મદદ મળશે. આ અંગે અમદાવાદ મ્યુનિસિપલ કોર્પોરેશન દ્વારા પરિપત્રિત સૂચનાઓ પણ જાહેર કરવામાં આવ્યા છે. આ યોજનાનો લાભ શોપિંગ મોલ, થિયેટર, વીડિયો પાર્લર, મીની-પ્લેક્સ, મલ્ટી-પ્લેક્સ, હોટલ, પાર્ટી પ્લોટ, કોમ્યુનિટી હોલ, વ્યાયામ કેન્દ્ર (જીમ્નેશિયમ), હોસ્પિટલ, સામાજિક સંસ્થાઓ, શૈક્ષણિક સંસ્થાઓ તેમજ નેશનલ હાઈ-વે, રીંગ રોડ અને સ્ટેટ હાઈ-વે પર આવેલ રહેણાંક સિવાયના તમામ એકમોને મળશે.
વેરામાફીનો આ લાભ મેળવવા માટે સંબંધિત વ્યાવસાયિક એકમોએ પોતાની પાર્કિંગ સુવિધા માટે કોઈપણ પ્રકારનો પાર્કિંગ ચાર્જ વસુલ કરવાનો રહેશે નહીં. આ ઉપરાંત, કોર્પોરેશનની સત્તાવાર વેબસાઈટ પર ઉપલબ્ધ “Parking Availability and Sharing Consent Form”માં જરૂરી વિગતો ભરી પાર્કિંગની જગ્યા નાગરિકો માટે ઉપલબ્ધ કરાવવા સંમતિ આપવાની રહેશે.
તેમજ ફોર્મમાં ઉપલબ્ધ પાર્કિંગ જગ્યાનું કુલ ક્ષેત્રફળ ECS (Equivalent Car Space) મુજબ દર્શાવવાનું રહેશે, જેમાં 1 ECS = 2.5*5.5 = 13.75 ચોરસ મીટર ગણાશે. પાર્કિંગ વ્યવસ્થા સુનિશ્ચિત કરવા માટે જવાબદાર વ્યક્તિની નિમણૂંક કરવાની રહેશે અને આ વ્યક્તિએ AMCની અધિકૃત AmadaPark Applicationમાં પાર્ક થયેલ વાહનોની એન્ટ્રી કરવાની રહેશે, જેથી વાહનચાલકોને રિયલ ટાઇમ પાર્કિંગ ઉપલબ્ધતાની માહિતી મળી શકે. તે સાથે દિશાસૂચક સાઈનેજ તથા પાર્કિંગ બે (Parking Bay) પણ ફરજિયાત મૂકવાના રહેશે.
મ્યુનિસિપલ કોર્પોરેશન દ્વારા સ્પષ્ટ કરવામાં આવ્યું છે કે જો કોઈ વ્યાવસાયિક એકમ પાર્કિંગ માટે ફી વસુલ કરશે, પાર્કિંગની જગ્યા નાગરિકો માટે ઉપલબ્ધ કરાવવા સંમતિ નહીં આપે અથવા AmadaPark Applicationનો ઉપયોગ નહીં કરે તો તેવા એકમોને પ્રોપર્ટી ટેક્સ વેરામાફીનો લાભ મળશે નહીં.
આ ઉપરાંત, જે કોમર્શિયલ એકમો વેરામાફીનો લાભ લેવા માંગતા નથી, તેમણે પોતાના પ્રિ-માઇસિસમાં આવેલી પાર્કિંગની જગ્યાના ક્ષેત્રફળ પર નિયત દરે પ્રોપર્ટી ટેક્સની આકારણી થાય તે માટે ફરજીયાત રીતે 60 દિવસની અંદર AMCની સત્તાવાર વેબસાઈટ પર Self-Assessment Module મારફતે અરજી કરવાની રહેશે.
