ગ્રીન ટેક્નોલોજીથી ગુજરાતના માર્ગોની કાયાપલટ: રાજ્યના ૨૦ રસ્તાઓ પર જૂના મટિરિયલના રિસાયક્લિંગથી નવા રોડ બનશે
બજેટમાં ₹૧૧૪૭ કરોડની જોગવાઈ-આનાથી નવા પથ્થરો માટે ખાણકામ (Mining) કરવાની કે બહારથી નવું મટિરિયલ લાવવાની જરૂરિયાત ખૂબ જ ઓછી થઈ જશે.
ગાંધીનગર: વડાપ્રધાન નરેન્દ્રભાઈ મોદીના ‘સ્પીડ અને સ્કેલ’ (ઝડપ અને વ્યાપ) ના વિઝનને સાકાર કરતા ભારતભરમાં રોડ નેટવર્કનો વિકાસ ખૂબ જ ઝડપથી થઈ રહ્યો છે.
આ જ વિઝનને આગળ ધપાવતા મુખ્યમંત્રી ભૂપેન્દ્રભાઈ પટેલના નેતૃત્વ હેઠળની ગુજરાત સરકારે રાજ્યના રસ્તાઓના આધુનિકીકરણ અને પર્યાવરણની સુરક્ષા માટે એક મોટો નિર્ણય લીધો છે. ગુજરાત સરકાર દ્વારા આ વર્ષના બજેટમાં ₹૧,૧૪૭ કરોડના ભારેખમ ખર્ચે માર્ગોના નિર્માણકાર્યમાં ‘ક્લાઇમેટ રેઝીલીયન્ટ’ (હવામાન અનુકૂળ) અને અદ્યતન ‘ગ્રીન ટેક્નોલોજી’ ના ઉપયોગની વિશેષ જોગવાઇ કરવામાં આવી હતી.
આ જોગવાઈને મૂર્ત સ્વરૂપ આપતા, હવે રાજ્યના વિવિધ જિલ્લાઓમાં ૨૦ મહત્વના માર્ગો પર આ ખાસ ગ્રીન ટેક્નોલોજીની મદદથી નિર્માણકાર્ય શરૂ થવા જઇ રહ્યું છે.
આ નવી ટેક્નોલોજીની સૌથી મોટી વિશેષતા એ છે કે તેમાં રસ્તા બનાવવાની પરંપરાગત પદ્ધતિને બદલે પર્યાવરણને અનુકૂળ અભિગમ અપનાવવામાં આવ્યો છે.
ગ્રીન ટેક્નોલોજી આધારિત રોડ નિર્માણથી મુખ્ય ત્રણ ફાયદાઓ થશે:
૧. ખર્ચમાં મોટો ઘટાડો: નવું રોડ મટિરિયલ ખરીદવા અને તેના પરિવહન (ટ્રાન્સપોર્ટેશન) નો અબજો રૂપિયાનો ખર્ચ બચશે. ૨. રસ્તાની મજબૂતીમાં વધારો: આ ટેક્નોલોજીથી બનતા રસ્તાઓ વધુ ટકાવ અને ભારે વરસાદ કે બદલાતા હવામાન સામે વધુ પ્રતિકારક શક્તિ (Climate Resilient) ધરાવતા બનશે, જેથી રસ્તાઓ વારંવાર તૂટશે નહીં. ૩. ઇકો-ફ્રેન્ડલી પ્રક્રિયા: કાર્બન ઉત્સર્જનમાં ઘટાડો થશે, કુદરતી સંસાધનોનો બગાડ અટકશે અને પર્યાવરણને અનુકૂળ ટકાઉ વિકાસને પ્રોત્સાહન મળશે.
ગુજરાત સરકારના માર્ગ અને મકાન વિભાગ દ્વારા આ ૨૦ માર્ગોની પસંદગી કરી લેવામાં આવી છે અને આગામી દિવસોમાં ગ્રીન ટેક્નોલોજીના માધ્યમથી આ રસ્તાઓનું મોડલ રોડ તરીકે રી-ડેવલપમેન્ટ શરૂ કરી દેવામાં આવશે. આ પ્રોજેક્ટ આગામી સમયમાં ભારતના અન્ય રાજ્યો માટે પણ ગ્રીન ઇન્ફ્રાસ્ટ્રક્ચરનું એક ઉત્કૃષ્ટ ઉદાહરણ સાબિત થશે.
