યોજનાના બીજા તબક્કા (2021-22)માં સમગ્ર દેશમાં32.35લાખ પ્રોપર્ટી કાર્ડ તૈયાર થયા,જેમાં ગુજરાતે રેકોર્ડ18.50લાખ કાર્ડ તૈયાર કરીને નોંધપાત્ર સિદ્ધિ મેળવી
રાજ્યમાં14,900ડ્રોન ફ્લાઇટ્સ દ્વારા11,511ગામોનું સચોટ મૅપિંગ અને પ્રમોલગેશન પૂર્ણ કરવામાં આવ્યું
ગુજરાતમાં મહેસાણા (1.66લાખ) તથા અમદાવાદ (1.53લાખ) જિલ્લાઓ પ્રોપર્ટીકાર્ડ તૈયાર કરવામાં આગળ
પ્રોપર્ટીકાર્ડથી ગામડાંઓમાં આર્થિક સશક્તિકરણના નવા દ્વાર ખુલ્યા;₹50 લાખ સુધીની બૅન્ક લોનનીસુવિધાથી ગ્રામ્ય ઉદ્યોગસાહસિકતાને નવી ગતિ મળી
ગાંધીનગર,વડાપ્રધાન શ્રી નરેન્દ્ર મોદીના નેતૃત્વ હેઠળ છેલ્લા12વર્ષોમાં કેન્દ્ર સરકારે ગ્રામીણ સશક્તિકરણની દિશામાં ઐતિહાસિક પહેલો હાથ ધરી છે,જેમાં ‘પ્રધાનમંત્રી સ્વામિત્વ યોજના’ એક સીમાચિહ્નરૂપ યોજના તરીકે ઊભરી છે. દાયકાઓ સુધી ગામડાઓમાં રહેણાંક મિલકતોના કાનૂની દસ્તાવેજો ઉપલબ્ધ ન હોવાથી ગ્રામજનો પોતાના જ ઘર-મિલકતના કાનૂની અધિકારો તેમજ વિવિધ આર્થિક લાભોથી વંચિત રહેતા હતા.
આજે સ્વામિત્વ યોજના દ્વારા ગામડાઓમાં રહેતા લોકોને પોતાની મિલકતનું સાચું ‘સ્વામિત્વ’ મળી રહ્યું છે,જેના પરિણામે તેઓ આર્થિક રીતે વધુ સશક્ત બની રહ્યા છે. એટલું જ નહીં,આ મહાઅભિયાનના સફળ અમલીકરણમાં ગુજરાતે સમગ્ર દેશમાં પ્રથમ સ્થાન મેળવીને એક અનોખી સિદ્ધિ હાંસલ કરી છે. રાજ્યની આ સિદ્ધિ એટલા માટે પણ વિશેષ છે કે,યોજનાના બીજા તબક્કામાં દેશભરમાં તૈયાર થયેલા કુલ પ્રોપર્ટી કાર્ડમાંથી50ટકાથી વધુ પ્રોપર્ટી કાર્ડ ફક્ત ગુજરાતમાં તૈયાર થયા છે.
14,900ડ્રોન ફ્લાઇટ્સ અને18.50લાખથી વધુ પ્રોપર્ટીકાર્ડ બનાવી: સ્વામિત્વ યોજનામાં ગુજરાતે રાષ્ટ્રીય રેકોર્ડ બનાવ્યો
મુખ્યમંત્રી શ્રી ભૂપેન્દ્ર પટેલના સક્ષમ નેતૃત્વ હેઠળ ગુજરાતે ‘પ્રધાનમંત્રી સ્વામિત્વ યોજના’ના અસરકારક અમલીકરણ દ્વારા સમગ્ર દેશ માટે એક આદર્શ ઉદાહરણ પૂરું પાડ્યું છે. અત્યાધુનિક ડ્રોન ટેક્નોલૉજીથી ગ્રામ્ય મિલકતોનું સચોટ સર્વેક્ષણ અને મૅપિંગ કરીને રાજ્ય સરકાર દ્વારા અત્યાર સુધીમાં18.50લાખથી વધુ ગ્રામીણ મિલકતોના કાયદાકીય દસ્તાવેજ તરીકે ‘પ્રોપર્ટીકાર્ડ’ તૈયાર કરવામાં આવ્યા છે.
ગુજરાતમાં વર્ષ2021-22માં સ્વામિત્વ યોજના બીજા તબક્કાની કામગીરી શરૂ થઇ હતી અને આજે અસરકારક આયોજન દ્વારા રાજ્ય આ યોજનાના અમલીકરણમાં દેશભરમાં પ્રથમ સ્થાને છે. આંકડાઓ પર નજર કરીએ,તો આ તબક્કામાં દેશભરના58,197ગામોમાં ડ્રોન સર્વે હાથ ધરવામાં આવ્યો હતો અને કુલ32,35,260પ્રોપર્ટી કાર્ડ તૈયાર કરવામાં આવ્યા હતા. તેમાં ફક્ત ગુજરાતે જ14,900ડ્રોન ફ્લાઇટ્સ દ્વારા11,511ગામોનું પ્રમોલગેશન પૂર્ણ કરીને સૌથી વધુ18,50,614પ્રોપર્ટી કાર્ડ તૈયાર કર્યા છે.
