અમદાવાદ: અમદાવાદ શહેરમાં સતત વધતા જતા વાહનોના ભારણ અને રોજબરોજ થતા અકસ્માતોની સમસ્યાના કાયમી ઉકેલ માટે વહીવટી તંત્ર દ્વારા એક મોટો નિર્ણય લેવામાં આવ્યો છે. અમદાવાદ અર્બન ડેવલપમેન્ટ ઓથોરિટી (AUDA) દ્વારા શહેરીજનોને ટ્રાફિકની જટિલ સમસ્યામાંથી મુક્તિ અપાવવા અને વાહનચાલકોની સુરક્ષા સુનિશ્ચિત કરવા માટે એક નવો ભવ્ય આઉટર રિંગ રોડ બનાવવાની યોજના તૈયાર કરવામાં આવી છે.
આ મહત્વાકાંક્ષી અને આધુનિક પ્રોજેક્ટ પાછળ અંદાજે રૂપિયા ૨૨૦૦ કરોડનો જંગી ખર્ચ કરવામાં આવશે. ઓથોરિટીના સત્તાવાર સૂત્રોના જણાવ્યા અનુસાર, આ નવા રિંગ રોડના નિર્માણનું કામ ડિસેમ્બર ૨૦૨૭ સુધીમાં પૂર્ણ થઈ જવાની પ્રબળ શક્યતાઓ સેવાઈ રહી છે. હાલમાં અમદાવાદમાં રિંગ રોડના ત્રીજા અને આખરી તબક્કાની કામગીરી શરૂ કરી દેવામાં આવી છે.
અમદાવાદના આ નવા પ્રસ્તાવિત માર્ગ પરથી રોજબરોજ અંદાજે એક લાખથી વધુ વાહનો પસાર થઈ શકે છે, જેને ધ્યાનમાં રાખીને વાહનચાલકોની સુરક્ષા અને સુવિધા માટે વિશેષ માળખું તૈયાર કરાયું છે.
આ ૩૦0 ફૂટ પહોળા આઉટર રિંગ રોડને બનાવવા માટે ઔડાએ તેની નવી ૧૦ વર્ષીય વિકાસ યોજના (DP – Development Plan) માં સત્તાવાર પ્રસ્તાવ મૂક્યો છે અને નવો ડીપી બનાવવાની કાર્યવાહી પણ હાથ ધરી દીધી છે.
આ નવો રોડ ડેડિકેટેડ ફ્રેટ કોરિડોરને સમાંતર હોવાથી દિલ્હી-મુંબઈ ફ્રેટ કોરિડોરના કામ સાથે તે કનેક્ટ થશે. ગોધાવી અને તેની આસપાસના ગામોમાં લોજિસ્ટિક ઝોન આવેલા હોવાથી, આ નવો માર્ગ બનવાથી ગુજરાતમાં માલસામાનની હેરફેર ઝડપી બનશે અને આ વિસ્તારોમાં મોટા લોજિસ્ટિક્સ પાર્ક પણ ઊભા થઈ શકશે, જે રોજગારીની નવી તકો સર્જશે.
