ડોલ્ફિન વાવાઝોડું આ વર્ષે ચીનમાં ત્રાટકનાર સૌથી શક્તિશાળી ચક્રવાત હોવાનું કહેવાય છે. તે સૌપ્રથમ જાપાનના દક્ષિણ ઓકિનાવા પ્રાંતમાંથી પસાર થયું હતું, જ્યાં તેનો પવન 216 કિલોમીટર પ્રતિ કલાકની ઝડપે પહોંચ્યો હતો. જેના કારણે 6 લોકો ઘાયલ થયા અને 50 હજારથી વધુ ઈમારતોમાં વીજળી ડૂલ થઈ ગઈ. ત્યારબાદ તે ચીન તરફ આગળ વધ્યું અને રવિવારે સાંજે લગભગ 5:30 વાગ્યે ઝેજિયાંગ પ્રાંતના યુહુઆન વિસ્તારમાં લેન્ડફોલ કર્યું. લેન્ડફોલ સમયે, તેના કેન્દ્રની નજીક પવનની ગતિ 151 કિલોમીટર પ્રતિ કલાકની હતી.
ચીનના હવામાન વિભાગે તેને આ વર્ષનું સૌથી શક્તિશાળી તોફાન ગણાવ્યું છે. આ પહેલા પૂર્વ ચીનના ઘણા વિસ્તારોમાં એલર્ટ જારી કરવામાં આવ્યું હતું. ઝેજિયાંગ, શાંઘાઈ, ફુજિયન અને આસપાસના પ્રાંતોમાં 10 લાખથી વધુ લોકોને સલામત સ્થળે ખસેડવામાં આવ્યા હતા. શાંઘાઈમાં લગભગ 1,500 ફ્લાઇટ્સ રદ કરવામાં આવી હતી અને જહાજોને બંદરો પરથી વાળવામાં આવ્યા હતા. ભારે વરસાદની ચેતવણી છે. કેટલાક વિસ્તારોમાં 250 થી 500 મીમી વરસાદ પડી શકે છે, જેનાથી પૂર અને ભૂસ્ખલનનું જોખમ વધી શકે છે. વાવાઝોડું હવે ધીમે ધીમે નબળું પડી રહ્યું છે અને પશ્ચિમ તરફ આગળ વધી રહ્યું છે.
99 હજાર લોકોને સુરક્ષિત બહાર કાઢવામાં આવ્યા હતા
વાવાઝોડાને કારણે વાહનવ્યવહાર વ્યવસ્થા પર ખરાબ અસર પડી છે. ફુજિયાનમાં લગભગ 99,000 લોકોને સ્થળાંતર કરવામાં આવ્યા હતા. અનેક ફેરી રૂટ બંધ કરી દેવાયા હતા અને બાંધકામનું કામ બંધ કરી દેવામાં આવ્યું હતું. હવામાન વિભાગનું કહેવું છે કે પૂર્વી અને મધ્ય ચીનના મોટા ભાગોમાં આગામી કેટલાક દિવસો સુધી ભારે વરસાદ ચાલુ રહી શકે છે. જેના કારણે નદીઓમાં જળસ્તર વધવાનો અને પહાડી વિસ્તારોમાં ભૂસ્ખલન થવાનો ભય છે.
