ઈરાનના દક્ષિણ હોર્મોઝગાન પ્રાંતમાં સ્ટ્રેટ ઓફ હોર્મુઝ પાસે આવેલા દરિયાકાંઠાના ગામ કુહેસ્તાકમાં મંગળવારની રાત્રે લગ્નની ખુશી એક ક્ષણમાં શોકમાં ફેરવાઈ ગઈ. મરિયમ માલાહી નામની છોકરીના લગ્નની ઉજવણી માટે એકઠા થયેલા સેંકડો લોકો વચ્ચે અચાનક જોરદાર વિસ્ફોટ થતાં સમગ્ર વિસ્તાર હચમચી ગયો હતો.
ઈરાની રેડ ક્રેસન્ટના જણાવ્યા અનુસાર, હુમલામાં એક નિર્દોષ 4 વર્ષના બાળક સહિત પાંચ લોકો માર્યા ગયા હતા, જ્યારે 67 અન્ય મહેમાનો ગંભીર રીતે ઘાયલ થયા હતા. રાહત અને બચાવ કામગીરી દરમિયાન કાટમાળમાંથી મૃતદેહો બહાર કાઢવામાં આવી રહ્યા હતા ત્યારે પણ લગ્નની રંગબેરંગી લાઇટો સળગી રહી હતી.
ખુશીનું વાતાવરણ ચીસોમાં ફેરવાઈ ગયું
દુલ્હનના પિતા અને સ્થાનિક માછીમાર અલી માલાહીએ જણાવ્યું કે લગ્ન સમારોહ માટે લગભગ 350 લોકો એકઠા થયા હતા. આ આખો વિસ્તાર કેવળ રહેણાંક હતો અને નજીકમાં કોઈ લશ્કરી થાણું નહોતું.
લગ્નના મહેમાન ઝૈનબ માલાહીએ જણાવ્યું હતું કે, “મહિલાઓ પરંપરાગત મંગલ ગીત ગાતી હતી ત્યારે અચાનક જ લિવિંગ રૂમની છત અને દિવાલો અમારા પર પડી હતી. તે ભયાનક વિસ્ફોટ દિવસ-રાત મારા કાનમાં ગુંજી રહ્યો છે.”
