વરિષ્ઠ ઓલરાઉન્ડર દીપ્તિ શર્માએ કહ્યું કે સતત પરાજય છતાં ભારતીય ટીમનું મનોબળ હંમેશની જેમ ઊંચું છે અને એક સપ્તાહના વિરામથી ટીમને રવિવારે ઇંગ્લેન્ડ સામે રમાનારી મહિલા વર્લ્ડ કપની નિર્ણાયક મેચ પહેલા એક થવા અને ધ્યાન કેન્દ્રિત કરવાની તક મળી છે. ગયા અઠવાડિયે દક્ષિણ આફ્રિકા અને ઓસ્ટ્રેલિયા સામે સતત પરાજય બાદ ભારતને ફટકો લાગ્યો છે અને હવે સેમિફાઇનલમાં સ્થાન મેળવવાની રેસમાં રહેવા માટે તેની બાકીની ત્રણ લીગ મેચોમાંથી બે જીતવી પડશે.
દીપ્તિએ ઈંગ્લેન્ડ સામેની મેચની પૂર્વ સંધ્યાએ પત્રકારોને જણાવ્યું હતું કે, “અમે બે મેચ હારી છે, પરંતુ તેનાથી અમારા મનોબળને અસર થઈ નથી કારણ કે અમે ટુર્નામેન્ટની શરૂઆતમાં બે સારી મેચ રમી હતી.” અમે હંમેશા સકારાત્મક માનસિકતા સાથે આગળ વધીએ છીએ અને ટીમ તરીકે અમે જે સારું કર્યું છે તેના પર વધુ ધ્યાન કેન્દ્રિત કરીએ છીએ.
પાંચ બોલરો સાથે રમવાની ભારતની રણનીતિ હજુ અસરકારક સાબિત થઈ નથી. જ્યારે દીપ્તિને ઈંગ્લેન્ડ સામેની મેચ માટે ટીમ કોમ્બિનેશન વિશે પૂછવામાં આવ્યું તો તેણે કહ્યું, “હું તમને તેના વિશે કંઈ કહી શકું નહીં.” આ ટીમ મેનેજમેન્ટનો નિર્ણય છે.
તેણે કહ્યું, “વિવિધ બોલરોએ અલગ-અલગ મેચોમાં સારું પ્રદર્શન કર્યું છે. દરેક વ્યક્તિએ પોતપોતાની ભૂમિકા ભજવી છે. અમે આવતીકાલની મેચ માટે સારું આયોજન કર્યું છે.” છેલ્લી વખત જ્યારે બંને ટીમો આમને સામને થઈ હતી, ત્યારે ભારતે ઈંગ્લેન્ડમાં 2-1થી યાદગાર વનડે શ્રેણી જીતી હતી અને દીપ્તિએ કહ્યું હતું કે ટીમ પરિણામમાંથી પ્રેરણા લેવાનો પ્રયાસ કરશે.
