પાકિસ્તાને ઝિમ્બાબ્વેને હરાવીને અને T20 ત્રિકોણીય શ્રેણીમાં જીતની હેટ્રિક ફટકારીને ફાઇનલમાં પોતાનું સ્થાન નિશ્ચિત કરી લીધું છે. હવે 25 નવેમ્બર, મંગળવારે આ ટુર્નામેન્ટમાં ઝિમ્બાબ્વે અને શ્રીલંકાની ટીમો બીજી વખત ટકરાશે ત્યારે બીજી ટીમ નક્કી થશે. તમને જણાવી દઈએ કે, આ ટૂર્નામેન્ટમાં જ્યારે પહેલીવાર ઝિમ્બાબ્વે અને શ્રીલંકા વચ્ચે મેચ રમાઈ હતી ત્યારે સિકંદર રઝાની ટીમે ખળભળાટ મચાવ્યો હતો અને શ્રીલંકાને 67 રનથી હરાવ્યું હતું. શ્રીલંકા આ ટૂર્નામેન્ટમાં હજુ સુધી એક પણ મેચ જીત્યું નથી. બાબર આઝમ અને ઉસ્માન તારિકે પાકિસ્તાનને ફાઇનલમાં લઈ જવામાં મહત્વની ભૂમિકા ભજવી હતી. બાબરે પહેલા 74 રનની શાનદાર ઇનિંગ રમીને ટીમને 195ના સ્કોર સુધી પહોંચાડી હતી, ત્યાર બાદ ઉસ્માન તારિકે હેટ્રિક લીધી હતી અને ઝિમ્બાબ્વેને 126ના સ્કોર પર આઉટ કર્યો હતો. પાકિસ્તાને આ મેચ 69 રનના માર્જિનથી જીતી લીધી હતી.
ટોસ જીતીને પ્રથમ બેટિંગ કરવા આવ્યા બાદ પાકિસ્તાન ટીમ માટે સાહિબજાદા ફરહાને શાનદાર અડધી સદી ફટકારી હતી. તેણે 41 બોલમાં 4 ચોગ્ગા અને ત્રણ છગ્ગાની મદદથી 63 રન બનાવ્યા હતા. પૂર્વ કેપ્ટન બાબર આઝમે તેને 74 રનની ઇનિંગનો સાથ આપ્યો હતો. બાબરે પોતાની ઇનિંગમાં 52 બોલનો સામનો કર્યો અને 7 ફોર અને 2 સિક્સર ફટકારી. બાબર અને ફરહાન વચ્ચે બીજી વિકેટ માટે સદીની ભાગીદારી થઈ હતી, બંનેએ 103 રન જોડ્યા હતા.
આ મેચમાં ફખર ઝમાને ફિનિશરની ભૂમિકા ભજવી હતી. 7મા નંબરે આવીને તેણે 10 બોલમાં 1 ફોર અને 3 ગગનચુંબી સિક્સરની મદદથી 27 રનની ધમાકેદાર ઇનિંગ રમી હતી. આ રીતે પાકિસ્તાને નિર્ધારિત 20 ઓવરમાં 5 વિકેટ ગુમાવીને 195 રન બનાવ્યા હતા.
