ભારત અને દક્ષિણ આફ્રિકા વચ્ચે બીજી ટેસ્ટ ગુવાહાટીના બરસાપારા ક્રિકેટ સ્ટેડિયમમાં રમાઈ રહી છે. દક્ષિણ આફ્રિકાએ મંગળવારે મેચના ચોથા દિવસે ભારતને 549 રનનો ટાર્ગેટ આપ્યો હતો અને ઈતિહાસ રચી દીધો હતો. ટેસ્ટમાં ભારતીય ધરતી પર કોઈપણ ટીમ દ્વારા ભારત સામે મુકવામાં આવેલો આ સૌથી વધુ લક્ષ્યાંક છે. દક્ષિણ આફ્રિકાએ ઓસ્ટ્રેલિયાનો 21 વર્ષ જૂનો રેકોર્ડ તોડ્યો છે. 2004માં નાગપુરમાં રમાયેલી ટેસ્ટમાં ઓસ્ટ્રેલિયાએ ભારતને 543 રનનો ટાર્ગેટ આપ્યો હતો.ત્યારબાદ ભારતે ઓસ્ટ્રેલિયા સામે 342 રનનો સામનો કરવો પડ્યો હતો.
આ સાથે જ દક્ષિણ આફ્રિકાએ ટેસ્ટ ક્રિકેટમાં ભારત સામે ત્રીજો સૌથી મોટો લક્ષ્યાંક રાખ્યો છે. ટેસ્ટમાં ભારત સામે સૌથી મોટો લક્ષ્યાંક નક્કી કરવાનો રેકોર્ડ પાકિસ્તાનના નામે છે. પાકિસ્તાને 2006માં કરાચીમાં ભારતને 697 રનનો ટાર્ગેટ આપ્યો હતો.તે પછી ઈંગ્લેન્ડની ટીમ છે. ઇંગ્લેન્ડે 2002માં લોર્ડ્સમાં ભારતને 568 રનનો ટાર્ગેટ આપ્યો હતો. ઇંગ્લેન્ડે 1959માં માન્ચેસ્ટરમાં ભારત માટે 548 રનનો ટાર્ગેટ આપ્યો હતો. ગુવાહાટી પહેલા ભારતમાં દક્ષિણ આફ્રિકાનો સૌથી વધુ ટાર્ગેટ 467 રનનો હતો, જે તેણે 1996માં ઇડન ગાર્ડન્સમાં સેટ કર્યો હતો.
ગુવાહાટી ટેસ્ટમાં ભારત માટે લક્ષ્યનો પીછો કરવો લગભગ અશક્ય છે. ટેસ્ટ ક્રિકેટના ઈતિહાસમાં ભારતે ક્યારેય ચોથી ઈનિંગમાં 445થી વધુ રન બનાવ્યા નથી. દક્ષિણ આફ્રિકાએ તેનો બીજો દાવ પાંચ વિકેટે 260 રન પર ડિકલેર કર્યો હતો. ટ્રિસ્ટન સ્ટબ્સ તેની ટેસ્ટ કારકિર્દીની ત્રીજી સદી માત્ર છ રનથી ચૂકી ગયો હતો. તેણે 180 બોલમાં 94 રન બનાવ્યા હતા. તેણે 9 ચોગ્ગા અને એક છગ્ગો ફટકાર્યો હતો. તેણે ટોની ડી જ્યોર્જી (49) સાથે ચોથી વિકેટ માટે 101 રન અને વિયાન મુલ્ડર (અણનમ 35) સાથે પાંચમી વિકેટ માટે 82 રનની ભાગીદારી કરી હતી.
ભારત તરફથી ઓલરાઉન્ડર રવિન્દ્ર જાડેજા સૌથી સફળ બોલર રહ્યો હતો. તેણે 62 રનમાં ચાર વિકેટ લીધી હતી. વોશિંગ્ટન સુંદરે એક વિકેટ લીધી હતી. દક્ષિણ આફ્રિકાએ પ્રથમ દાવમાં 288 રનની લીડ મેળવી હતી. દક્ષિણ આફ્રિકાના 489 રનના જવાબમાં ભારતીય ટીમ પ્રથમ દાવમાં 201 રનમાં ઓલઆઉટ થઈ ગઈ હતી.
