મુંબઈના બેટ્સમેન આયુષ મ્હાત્રેને 12 ડિસેમ્બરથી દુબઈમાં યોજાનારા ACC અંડર-19 એશિયા કપ માટે ભારતની અંડર-19 ટીમનો કેપ્ટન બનાવવામાં આવ્યો છે.શુક્રવારે ટીમની જાહેરાત થયા બાદ મુંબઈના બેટ્સમેન આયુષ મ્હાત્રે સૈયદ મુશ્તાક અલી T20 ટ્રોફીની એલિટ ગ્રુપ A મેચમાં વિદર્ભ સામે મેચવિનિંગ ઇનિંગ રમી હતી. મ્હાત્રેની ઇનિંગ્સથી, ડિફેન્ડિંગ ચેમ્પિયન મુંબઈએ શરૂઆતના આંચકામાંથી બહાર નીકળીને એકાના સ્ટેડિયમમાં 13 બોલ બાકી રહેતા 193 રનનો લક્ષ્યાંક હાંસલ કર્યો હતો. ટીમે 17.5 ઓવરમાં ત્રણ વિકેટે 194 રન બનાવ્યા હતા.
18 વર્ષીય આયુષ મ્હાત્રેએ તેની પ્રથમ ટી20 સદીમાં આઠ છગ્ગા અને એટલા ચોગ્ગા ફટકાર્યા હતા. તેણે પોતાની ટીમ માટે માત્ર 59 બોલમાં અણનમ 110 રનની તોફાની ઇનિંગ્સ રમી, જેના કારણે મુંબઈને મજબૂત સ્કોર સુધી પહોંચવામાં મદદ મળી. અજિંક્ય રહાણે (0) અને હાર્દિક તામોર (1)ના આઉટ થતાં મુંબઈને શરૂઆતની ઓવરોમાં બે આંચકાઓ લાગ્યા હતા. ટીમનો સ્કોર બે વિકેટે 21 રન થઈ ગયો હતો.
ભારતીય T20 કેપ્ટન સૂર્યકુમાર યાદવે 30 બોલમાં ચાર ચોગ્ગા અને એક છગ્ગાની મદદથી 35 રનની શાનદાર ઇનિંગ રમીને પુનરાગમન ચાલુ રાખ્યું હતું અને મ્હાત્રે સાથે ત્રીજી વિકેટ માટે 88 રનની ભાગીદારી કરીને મુંબઈની ઇનિંગ્સને સંભાળી હતી. તે 12મી ઓવરમાં યશ ઠાકુરના બોલ પર યશ રાઠોડના હાથે કેચ આઉટ થયો હતો.
આ પછી ક્રિઝ પર આવેલા ભારતીય ઓલરાઉન્ડર દુબેએ 19 બોલમાં ત્રણ છગ્ગા અને એટલા જ ચોગ્ગા સાથે 39 રનની અણનમ ઈનિંગ રમી હતી. તેણે મ્હાત્રે સાથે માત્ર 35 બોલમાં 85 રનની અતૂટ ભાગીદારી કરીને મુંબઈને મોટી જીત અપાવી હતી. આ પહેલા અથર્વ તાયડે (64) અને અમન મોખાડે (61)ની અડધી સદીની મદદથી વિદર્ભે નવ વિકેટે 192 રનનો મજબૂત સ્કોર બનાવ્યો હતો.
