ભારત અને સાઉથ આફ્રિકા વચ્ચે 30 નવેમ્બર, રવિવારથી 3 મેચની વનડે શ્રેણી શરૂ થઈ રહી છે. પ્રથમ મેચ રાંચીમાં રમાશે. આ મેચમાં ટીમ ઈન્ડિયાના સ્ટાર ખેલાડી વિરાટ કોહલી ફરી એકવાર એક્શનમાં જોવા મળશે. વિરાટ કોહલીની નજર સાઉથ આફ્રિકા સામેની વનડે સિરીઝમાં ક્રિકેટના ભગવાન તરીકે ઓળખાતા સચિન તેંડુલકરના એક નહીં પરંતુ 2-2 વર્લ્ડ રેકોર્ડ પર રહેશે. કિંગ કોહલી માત્ર એક સદી સાથે આ બંને વર્લ્ડ રેકોર્ડ તોડી નાખશે. કોઈપણ ફોર્મેટમાં બેટ્સમેન દ્વારા સૌથી વધુ સદી અને દક્ષિણ આફ્રિકા સામે ODIમાં સૌથી વધુ સદીના આ બે રેકોર્ડ છે.
એક ફોર્મેટમાં સૌથી વધુ સદી
જો આપણે એક ફોર્મેટમાં સૌથી વધુ સદી ફટકારનાર બેટ્સમેનોની વાત કરીએ તો હાલમાં વિરાટ કોહલી સચિન તેંડુલકરની બરાબરી પર છે. માસ્ટર બ્લાસ્ટરે તેની કારકિર્દીમાં એક જ ફોર્મેટમાં ટેસ્ટમાં સૌથી વધુ 51 સદી ફટકારી છે. વિરાટ કોહલીએ ODIમાં આ કારનામું કર્યું છે.
જો રન મશીન વિરાટ કોહલી સાઉથ આફ્રિકા સામેની ત્રણ મેચની સીરીઝમાં એક પણ સદી ફટકારે છે તો તે ક્રિકેટના ઈતિહાસમાં એક જ ફોર્મેટમાં 52 સદી ફટકારનાર પ્રથમ બેટ્સમેન બની જશે.
