પાકિસ્તાને રવિવારે ત્રિકોણીય શ્રેણીની ફાઇનલમાં શ્રીલંકાને 6 વિકેટે હરાવીને ટ્રોફી જીતી લીધી હતી. રાવલપિંડી ક્રિકેટ સ્ટેડિયમમાં રમાયેલી મેચમાં પ્રથમ બેટિંગ કરતા શ્રીલંકાએ 19.1 ઓવરમાં તમામ વિકેટ ગુમાવીને 114 રન બનાવ્યા હતા. જવાબમાં પાકિસ્તાને શાહિબજાદા ફરહાન અને સેમ અયુબની મજબૂત શરૂઆતના આધારે 8 બોલ બાકી રહેતા મેચ જીતી લીધી હતી. પાકિસ્તાને 18.4 ઓવરમાં 4 વિકેટ ગુમાવીને 118 રન બનાવ્યા હતા. પાકિસ્તાન તરફથી બાબર આઝમે સૌથી વધુ 37 રન બનાવ્યા હતા.
શ્રીલંકાએ આપેલા 115 રનના લક્ષ્યાંકનો પીછો કરવા ઉતરેલી પાકિસ્તાનની ટીમને શાહિબઝાદા ફરહાન અને સેમ અયુબે જોરદાર શરૂઆત અપાવી હતી. બંને વચ્ચે પ્રથમ વિકેટ માટે 46 રનની ભાગીદારી થઈ હતી. ઈશાન મલિંગાએ આ જોડી તોડી હતી. ફરહાન 22 બોલમાં 23 રન બનાવીને પેવેલિયન પરત ફર્યો હતો. સેમ અયુબ 33 બોલમાં 36 રન બનાવીને આઉટ થયો હતો. તેણે પોતાની ઇનિંગમાં 6 ચોગ્ગા ફટકાર્યા હતા. કેપ્ટન સલમાન આગા 14 બોલમાં માત્ર 14 રન જ બનાવી શક્યો હતો. ફખર ઝમાન 5 બોલમાં ત્રણ રન બનાવીને સસ્તામાં પેવેલિયન પરત ફર્યો હતો. બાબર આઝમ 34 બોલમાં 37 રન બનાવીને અણનમ પરત ફર્યો હતો. તેણે પોતાની ઇનિંગમાં બે ચોગ્ગા અને એક છગ્ગા ફટકાર્યા હતા. ઉસ્માન ખાન ત્રણ રન બનાવીને અણનમ રહ્યો હતો. બાબર આઝમે ચોગ્ગો ફટકારીને પોતાની ટીમને જીત તરફ દોરી હતી.
આ પહેલા સારી શરૂઆત મળવા છતાં શ્રીલંકાની ટીમ 19.1 ઓવરમાં 114 રન પર જ સિમિત રહી હતી. પાકિસ્તાને ટોસ જીતીને પ્રથમ બોલિંગ કરવાનો નિર્ણય કર્યો હતો. બેટિંગમાં ઉતરેલી શ્રીલંકાની ટીમ 19.1 ઓવરમાં પાકિસ્તાની બોલરોએ 114 રનમાં ઓલઆઉટ થઈ ગઈ હતી. શ્રીલંકાની શરૂઆત સારી રહી ન હતી અને 20 રનના સ્કોર પર તેની પ્રથમ વિકેટ ગુમાવી દીધી હતી. ત્રીજી ઓવરમાં શાહિને પથુમ નિસાંકા (11)ને આઉટ કરીને પાકિસ્તાનને પ્રથમ સફળતા અપાવી હતી.
આ પછી બેટિંગ કરવા આવેલા કુસલ મેન્ડિસે કામિલ મિશ્રા સાથે બીજી વિકેટ માટે 64 રન જોડ્યા હતા. મોહમ્મદ નવાઝે 11મી ઓવરમાં કુસલ મેન્ડિસ (14)ને આઉટ કરીને આ ભાગીદારીને તોડી હતી. આ પછી, કામિલ મિશ્રા સિવાય, શ્રીલંકાના કોઈપણ બેટ્સમેન પાકિસ્તાનના બોલિંગ આક્રમણ સામે બે આંકડા સુધી પણ પહોંચી શક્યા ન હતા. પાકિસ્તાન તરફથી શાહીન શાહ આફ્રિદી અને મોહમ્મદ નવાઝે ત્રણ-ત્રણ વિકેટ લીધી હતી. અબરાર અહેમદને બે વિકેટ મળી હતી. સલમાન મિર્ઝા અને સેમ અયુબે એક-એક બેટ્સમેનને આઉટ કર્યા હતા.
