ટીમ ઈન્ડિયાનો ઓપનિંગ બેટ્સમેન રોહિત શર્મા રાંચીમાં સાઉથ આફ્રિકા સામે રમાયેલી પહેલી ODI દરમિયાન ફુલ ફોર્મમાં જોવા મળ્યો હતો. હિટમેને 51 બોલમાં 5 ચોગ્ગા અને 3 ગગનચુંબી છગ્ગા સાથે 57 રનની ઇનિંગ રમી હતી. આ દરમિયાન તેણે વિરાટ કોહલી સાથે સદીની ભાગીદારી પણ કરી હતી. રોહિતે પોતાની ઈનિંગમાં 3 સિક્સર ફટકારીને ઈતિહાસ રચ્યો હતો. તે હવે ODI ક્રિકેટમાં સૌથી વધુ સિક્સર મારનાર બેટ્સમેન બની ગયો છે. આ લિસ્ટમાં તેણે પાકિસ્તાનના પૂર્વ કેપ્ટન શાહિદ આફ્રિદીને હરાવ્યો છે. જ્યારે રોહિત શર્માના સિક્સરના રેકોર્ડની સરખામણી આફ્રિદી સાથે કરવામાં આવી ત્યારે પૂર્વ ક્રિકેટર અતુલ વાસને કહ્યું કે સફરજનની સરખામણી નારંગી સાથે કરવા જેવું છે.
રોહિત શર્માના નામે હવે ODI ક્રિકેટમાં 352 સિક્સર છે, તેણે 269 ઇનિંગ્સમાં આ સિદ્ધિ હાંસલ કરી છે. જ્યારે શાહિદ આફ્રિદીએ 369 ઇનિંગ્સમાં 351 સિક્સર ફટકારી હતી, જે રોહિત શર્મા કરતાં 100 વધુ ઇનિંગ્સ છે.
ANI સાથે વાત કરતા અતુલ વાસને કહ્યું કે રોહિતના રેકોર્ડની આફ્રિદી સાથે સરખામણી કરવી યોગ્ય નથી કારણ કે રોહિતે ઓપનર તરીકે 100 ઓછી ઇનિંગ્સમાં આ સિદ્ધિ હાંસલ કરી હતી, જે ભારત માટે તેની મોટી અસર દર્શાવે છે.
તેણે કહ્યું, “મને લાગે છે કે જો આપણે તેની સરખામણી શાહિદ આફ્રિદીના રેકોર્ડ સાથે કરીએ તો તે સફરજન અને નારંગીની સરખામણી કરવા જેવું છે. કારણ કે એક ઓપનર માટે તે કરી શકવું એ એક મોટી વાત છે. કારણ કે શાહિદ આફ્રિદીની ભૂમિકા મોડા આવવાની હતી અને ફિનિશિંગ અને સ્લોગ કરવાની હતી. પરંતુ ઓપનર તરીકે 100 ઓછી ઇનિંગ્સમાં આટલો મોટો રેકોર્ડ બનાવવો તે ભારતીય ટીમ માટે કેટલી અસર કરે છે તે દર્શાવે છે.”
