એશિઝ શ્રેણીમાં ઓસ્ટ્રેલિયા સામે 2-0થી પાછળ ચાલી રહેલી ઈંગ્લેન્ડની ટીમને શ્રેણીની ત્રીજી મેચ પહેલા મોટો ફટકો પડ્યો છે. ઈજાથી પીડિત ફાસ્ટ બોલર માર્ક વૂડ એશિઝ શ્રેણીમાંથી બહાર થઈ ગયો છે. માર્ક વૂડને ડાબા પગમાં ઘૂંટણમાં ઈજા થઈ છે, જેના કારણે તે એશિઝ શ્રેણીની બાકીની મેચો રમી શકશે નહીં. પર્થમાં રમાયેલી પ્રથમ ટેસ્ટ મેચમાં તે ઈંગ્લેન્ડની ટીમનો ભાગ હતો, પરંતુ બીજી મેચ માટે ઉપલબ્ધ નહોતો. ઈંગ્લેન્ડની ટીમમાં એક નવા ફાસ્ટ બોલરની એન્ટ્રી થઈ છે જે છે મેથ્યુ ફિશર.
માર્ક વુડ ECB મેડિકલ સ્ટાફની દેખરેખ હેઠળ તેનું પુનર્વસન શરૂ કરવા માટે આ અઠવાડિયાના અંતમાં ઘરે પરત ફરશે. તેમણે ફેબ્રુઆરીમાં ઘૂંટણની સર્જરી કરાવી હતી. આ પછી, તેણે પર્થમાં તેની પ્રથમ સ્પર્ધાત્મક મેચ રમી, પરંતુ ફરીથી ઈજા થઈ. તેની કારકિર્દીમાં તેને ઘણી વખત ઈજાઓનો સામનો કરવો પડ્યો છે. તેની ઉંમરને જોતાં, ઇંગ્લેન્ડ માટે તેના લાંબા ગાળાના ભવિષ્ય વિશે નવા પ્રશ્નો ઉભા થયા છે. ઈંગ્લેન્ડે વુડની જગ્યાએ સરેના સીમર મેથ્યુ ફિશરને ટીમમાં સામેલ કર્યો છે.
ફિશર તાજેતરમાં એશિઝ શ્રેણી પહેલા ઇંગ્લેન્ડ લાયન્સ ટીમ સાથે ઓસ્ટ્રેલિયામાં હતો. આ પ્રવાસમાં તેને ત્રણ મેચમાં માત્ર બે વિકેટ મળી હતી. મેટ ફિશરે વધુ અસર છોડી ન હતી, પરંતુ તે હજુ પણ માર્ક વુડના સ્થાને જોવામાં આવે છે. ફિશરે અત્યાર સુધી માત્ર એક જ ટેસ્ટ મેચ રમી છે, જે 2022માં વેસ્ટ ઈન્ડિઝ સામે હતી. ફિશરને એન્ટિગુઆમાં રમાયેલી મેચમાં એકમાત્ર વિકેટ મળી હતી.
ફાસ્ટ બોલર મેથ્યુ ફિશર પાસે ઓસ્ટ્રેલિયામાં છાપ છોડવાની તક છે. એશિઝની આગામી ત્રણ ટેસ્ટ મેચોમાં તેને તક મળે તેવી શક્યતા છે, કારણ કે ઈંગ્લેન્ડની ટીમની હાલત સારી નથી. ટીમ 2 મેચ હારી છે. જો તેઓ વધુ એક મેચ હારી જશે તો તેઓ શ્રેણી ગુમાવશે. આવી સ્થિતિમાં, ઇંગ્લિશ ટીમ અહીંથી તેની તમામ શક્તિ સાથે આગળ વધશે, જેથી તે શ્રેણીમાં ટકી શકે અને 17 ડિસેમ્બરથી યોજાનારી ટેસ્ટ મેચ જીતી શકે.
