IPL 2026 ની હરાજી પહેલા ભારતીય ક્રિકેટ કંટ્રોલ બોર્ડ એટલે કે BCCI દ્વારા એક મોટી ભૂલ કરવામાં આવી હતી. હરાજીમાં સામેલ કેટલાક ખેલાડીઓને BCCI દ્વારા અજાણતામાં અંતિમ યાદીમાંથી બહાર રાખવામાં આવ્યા હતા. જો કે, થોડા કલાકો પછી, BCCIએ પોતાની ભૂલ સુધારી અને અંતિમ યાદીમાં 9 નવા ખેલાડીઓનો સમાવેશ કર્યો. બીસીસીઆઈએ હરાજી માટે 350 ખેલાડીઓને ફાઈનલ કર્યા હતા, જેમાં 9 નવા નામ ઉમેરાયા બાદ આ યાદીમાં 359 ખેલાડીઓ થઈ ગયા છે.
અબુધાબીમાં 16 ડિસેમ્બરે યોજાનારી મીની હરાજીમાં 1300 થી વધુ ખેલાડીઓએ રજીસ્ટ્રેશન કરાવ્યું હતું, જેમાંથી લગભગ 1000 ખેલાડીઓને બાકાત રાખવામાં આવ્યા છે. નવા ખેલાડીઓમાં IPL વિજેતા સ્વસ્તિક ચિકારાનો સમાવેશ થાય છે, જેને તાજેતરમાં રોયલ ચેલેન્જર્સ બેંગ્લોર દ્વારા બહાર પાડવામાં આવ્યો હતો અને વિરનદીપ સિંહ, જેઓ આ વર્ષના હરાજી પૂલમાં સહયોગી દેશ (મલેશિયા) ના એકમાત્ર ખેલાડી છે. ઉમેરાયેલા અન્ય સાત ખેલાડીઓમાં ત્રિપુરાના ઓલરાઉન્ડર મણિશંકર મુરાસિંઘ, ચામા મિલિંદ (હૈદરાબાદ), કે.એલ. શ્રીજીત (કર્ણાટક), એથન બોશ (દક્ષિણ આફ્રિકા), ક્રિસ ગ્રીન (ઓસ્ટ્રેલિયા), રાહુલ રાજ નમલા (ઉત્તરાખંડ) અને વિરાટ સિંહ (ઝારખંડ).
359 ખેલાડીઓની આ અંતિમ યાદીમાં 247 ખેલાડીઓ ભારતીય છે જ્યારે 112 વિદેશી ખેલાડીઓ છે. જોકે, માત્ર 77 સ્લોટ ભરવાના છે. આ રીતે, 200 થી વધુ ખેલાડીઓ હજુ પણ વેચાયા વગરના રહેવાના છે. તેમાંથી 31 વિદેશી ખેલાડીઓ પણ IPL કોન્ટ્રાક્ટ મેળવવામાં સફળ થઈ શકે છે. કોલકાતા નાઈટ રાઈડર્સ એટલે કે KKR પાસે સૌથી વધુ 64.30 કરોડ રૂપિયા છે અને તેણે 13 ખેલાડીઓની જગ્યા ભરવાની છે, ત્યારબાદ ચેન્નાઈ સુપર કિંગ્સ રૂપિયા 43.4 કરોડ સાથે છે. તેમની પાસે 9 સ્લોટ ખાલી છે.
BCCI દ્વારા કરવામાં આવેલી બીજી ભૂલ એ હતી કે બોર્ડે દિલ્હીમાં જન્મેલા નિખિલ ચૌધરીને ભારતીય અનકેપ્ડ ખેલાડી તરીકે અંતિમ યાદીમાં સામેલ કર્યો હતો, પરંતુ તે હવે ઓસ્ટ્રેલિયામાં સ્થાયી થયો છે અને ત્યાં સ્થાનિક ક્રિકેટ રમે છે. આવી સ્થિતિમાં, તેની શ્રેણી ઓસ્ટ્રેલિયન અનકેપ્ડ ખેલાડી તરીકે બદલવામાં આવી છે, જે અગાઉ ભારતીય અનકેપ્ડ ખેલાડી તરીકે હતી. નિખિલ ચૌધરી બિગ બેશ લીગમાં રમી ચૂક્યો છે.
