બાંગ્લાદેશમાં ઉસ્માન હાદીના મોત બાદ ફાટી નીકળેલી હિંસાની આગ શમવાને બદલે વધી રહી છે. ઈન્કલાબ મંચે આજથી એટલે કે રવિવારથી ઢાકા અને રાજધાનીની બહાર પોતાનો વિરોધ ઉગ્ર બનાવ્યો છે. ઈન્કલાબ મંચે દેશવ્યાપી હડતાળનું એલાન આપ્યું છે. સવારે 11 વાગ્યાથી બંધનો પ્રારંભ થયો છે. તે જ સમયે, ઇન્કલાબ મંચના સભ્યોએ યુનુસ સરકારને ‘બળવા’ની ચેતવણી પણ આપી છે.
ઈન્કલાબ મંચે ફેસબુક પોસ્ટ દ્વારા જાણકારી આપી કે ઢાકાના શાહબાગ વિસ્તારમાં જોરદાર પ્રદર્શન કરવામાં આવશે. શુક્રવારથી અહીં અનેક કામદારો હડતાળ પર બેઠા છે. શનિવારે પણ વિરોધ પ્રદર્શનને કારણે ઢાકામાં ઘણી જગ્યાએ ટ્રાફિક જામ થયો હતો. ઈન્કલાબ મંચે ઢાકા, સિલ્હેટ, ચટ્ટોગ્રામ અને કુશ્તિયામાં દેખાવો કર્યા. શાહબાગમાં ઈન્કલાબ મંચના સભ્ય અબ્દુલ્લાએ કહ્યું કે આજે અમે શાહબાગમાં છીએ પરંતુ આવતી કાલ સુધી જમુનાને પકડી લેવામાં આવશે. તમને જણાવી દઈએ કે વચગાળાની સરકારના મુખ્ય સલાહકાર મોહમ્મદ યુનુસના ઘરનું નામ જમુના છે.
