ઉત્તર પ્રદેશની યોગી આદિત્યનાથ સરકાર દ્વારા લાગુ કરવામાં આવેલી નવી આબકારી નીતિએ રાજ્યની આવક, સુરક્ષા અને ઔદ્યોગિક રોકાણનું ચિત્ર બદલી નાખ્યું છે. વર્ષ 2025 આબકારી વિભાગ માટે માળખાકીય સુધારાઓ અને તકનીકી ફેરફારો માટે એક મહત્વપૂર્ણ સીમાચિહ્નરૂપ સાબિત થયું છે. સરકારની ‘ઝીરો ટોલરન્સ’ નીતિ અને ‘ઈ-ગવર્નન્સ’ના સંકલનથી આ ક્ષેત્રમાં પારદર્શિતા સાથે રેકોર્ડબ્રેક કમાણી સુનિશ્ચિત થઈ છે.
નવી આબકારી નીતિ હેઠળ વિભાગની સમગ્ર કામગીરીને ‘ટેક્નોલોજી આધારિત’ બનાવવામાં આવી છે. હવે દારૂની દુકાનોની ફાળવણી સંપૂર્ણપણે ઈ-લોટરી પદ્ધતિથી થાય છે, જેનાથી ભ્રષ્ટાચારનો અવકાશ ખતમ થઈ ગયો છે. વધુમાં, લેબલની મંજૂરી, MRP નક્કી કરવા અને નિકાસ પરમિટ જેવી તમામ પ્રક્રિયાઓ ઓનલાઈન કરવામાં આવી છે.
સર્વેલન્સને કડક બનાવવા માટે ઉત્પાદન એકમો અને ડિસ્ટિલરીઓમાં સીસીટીવી કેમેરા લગાવવામાં આવ્યા છે. તેમજ દારૂની હેરફેર કરતા ટેન્કરોમાં ડીજીટલ લોક અને જીપીએસ ફરજીયાત કરવામાં આવ્યા છે, જેથી વાહન વ્યવહારમાં ભેળસેળ કે ચોરીની શક્યતાને સંપૂર્ણપણે દૂર કરી શકાય.
આવકમાં 15% થી વધુનો રેકોર્ડ વધારો
યોગી સરકારની નીતિઓની સીધી અસર સરકારી તિજોરી પર જોવા મળી રહી છે. નાણાકીય વર્ષ 2025-26 ના ડેટા અનુસાર, નવેમ્બર 2025 સુધી, રાજ્યને કુલ રૂ. 35,144.11 કરોડની આબકારી આવક મળી છે. જે ગયા વર્ષના સમાન સમયગાળા (2024-25) કરતા 15.59 ટકા વધુ છે. સરકારે ગયા વર્ષની સરખામણીમાં માત્ર આઠ મહિનામાં રૂ. 4,741.77 કરોડની વધારાની આવક નોંધાવી છે.
ઇથેનોલ ઉત્પાદનમાં યુપી નંબર-1 બન્યું
ઉત્તર પ્રદેશ હવે દેશના મુખ્ય ઇથેનોલ હબ તરીકે ઉભરી આવ્યું છે. આ વર્ષે રાજ્યમાં ઇથેનોલનું ઉત્પાદન 182 કરોડ લીટર સુધી પહોંચી ગયું છે, જે અત્યાર સુધીનો સૌથી મોટો રેકોર્ડ છે. તેમાંથી 105.25 કરોડ લિટર ઇથેનોલનો રાજ્યમાં વપરાશ થયો હતો, જ્યારે 40.96 કરોડ લિટર અન્ય રાજ્યોમાં નિકાસ કરવામાં આવ્યો હતો. આનાથી માત્ર ઉદ્યોગો જ મજબૂત નથી થયા પરંતુ શેરડીના ખેડૂતોની આવકમાં પણ વધારો થયો છે.
