હૈદરાબાદ ક્રિકેટ ટીમના કોચ ડીબી રવિ તેજાએ તિલક વર્માના આગામી T20 વર્લ્ડ કપમાંથી બહાર હોવાની અટકળોને ફગાવી દેતા કહ્યું કે તે ઠીક છે અને ટૂંક સમયમાં આંતરરાષ્ટ્રીય મેચો માટે તૈયાર થઈ જશે. તિલકનું આગામી આંતરરાષ્ટ્રીય શેડ્યૂલ ન્યુઝીલેન્ડ સામેની T20 હોમ સિરીઝ છે, જે આજથી બરાબર બે અઠવાડિયા પછી 21 જાન્યુઆરીથી નાગપુરમાં શરૂ થશે. મીડિયા અને સોશિયલ મીડિયાના કેટલાક વિભાગોમાં એવી અટકળો છે કે 7 ફેબ્રુઆરીથી શરૂ થઈ રહેલા T20 વર્લ્ડ કપ માટે તિલક વર્માની ઉપલબ્ધતા શંકાસ્પદ હોઈ શકે છે.
હૈદરાબાદના કોચ કહે છે કે ડાબોડી બેટ્સમેન તિલક વર્મા આગામી પાંચ મેચની શ્રેણી માટે તૈયાર હશે “તેમની બુધવારે રાજકોટમાં ખૂબ જ નાની સર્જરી થઈ હતી. તેમાં ગંભીર કે ચિંતાજનક કંઈ નથી. તે ત્રણથી ચાર દિવસમાં ઠીક થઈ જશે,” હૈદરાબાદના કોચે ગુરુવારે ક્રિકબઝને જણાવ્યું હતું.
હૈદરાબાદની બંગાળ સામેની મેચ દરમિયાન ઈજાગ્રસ્ત થયા બાદ બુધવારે રાજકોટમાં તિલકની ટેસ્ટિક્યુલર ટોર્સિયન સર્જરી કરવામાં આવી હતી. કોચે વધુમાં કહ્યું કે, “તિલક અત્યારે ટીમ સાથે છે અને તે ટીમ સાથે હૈદરાબાદ પરત જશે. મને અંગત રીતે લાગે છે કે તે ન્યૂઝીલેન્ડ સામેની ટી20 શ્રેણી માટે ઠીક રહેશે.”
ભારતીય બેટ્સમેન તિલક વર્માએ મંગળવારે રાજકોટમાં બંગાળ સામેની વિજય હજારે ટ્રોફી મેચ બાદ દુખાવાની ફરિયાદ બાદ પેટના નીચેના ભાગમાં સર્જરી કરાવી છે. તિલકને તરત જ સ્કેન કરાવવાની સલાહ આપવામાં આવી હતી અને ત્યારબાદ તેમની સર્જરી કરવામાં આવી હતી. હવે તે આગામી દિવસોમાં બીસીસીઆઈ સેન્ટર ઓફ એક્સેલન્સને રિપોર્ટ કરે તેવી અપેક્ષા છે.
