વૈશ્વિક ટેક કંપની માઇક્રોસોફ્ટે ભારત, યુએસ, યુકે અને કેનેડામાં પસંદગીના કર્મચારીઓ માટે સ્વૈચ્છિક નિવૃત્તિ યોજના શરૂ કરી છે. કંપનીનું કહેવું છે કે આની મદદથી તે પોતાની ટીમોને બિઝનેસની જરૂરિયાતો અનુસાર વધુ સારી રીતે ગોઠવી શકશે અને આર્ટિફિશિયલ ઈન્ટેલિજન્સ (AI) અને ક્લાઉડ ટેક્નોલોજી પર વધુ ધ્યાન કેન્દ્રિત કરી શકશે.
કંપનીના એક્ઝિક્યુટિવ વાઇસ પ્રેસિડેન્ટ અને ચીફ હ્યુમન રિસોર્સ ઓફિસર એમી કોલમેને એક બ્લોગ પોસ્ટમાં માહિતી આપી છે કે આ સ્કીમ ચારેય દેશોમાં પસંદગીની ટીમોના કર્મચારીઓ માટે ઉપલબ્ધ હશે, જેમનો આંતરિક જોબ ગ્રેડ 70 અથવા તેનાથી ઓછો છે. સમગ્ર વિશ્વમાં લગભગ 60000 કર્મચારીઓ આ ‘સ્વૈચ્છિક એક્ઝિટ ઑફર’ માટે પાત્ર છે.
માઈક્રોસોફ્ટના લગભગ 23,000 કર્મચારીઓ ભારતમાં કામ કરે છે. જો કે, હજુ સુધી એ સ્પષ્ટ નથી થયું કે દેશમાં કેટલા કર્મચારીઓ આ યોજના હેઠળ પાત્ર બનશે. સૂત્રોના જણાવ્યા અનુસાર, ભારતમાં યોગ્ય કર્મચારીઓને દરખાસ્ત પર નિર્ણય લેવા માટે 1 ડિસેમ્બર સુધીનો સમય આપવામાં આવ્યો છે.
નોકરી છોડનારાઓને શું મળશે?
જે કર્મચારીઓ કંપની છોડવાનું પસંદ કરે છે તેમને નાણાકીય સહાય અને કારકિર્દી માર્ગદર્શન બંને પ્રદાન કરવામાં આવશે. પેકેજમાં મુખ્યત્વે આ બાબતોનો સમાવેશ થાય છે-
- સેવાના દરેક પૂર્ણ વર્ષ માટે એક મહિનાના મૂળ પગારની બરાબર રકમ
- આરોગ્ય વીમો
-નવી નોકરી અથવા કારકિર્દી પરિવર્તન માટે મદદ અને માર્ગદર્શન
