અનુભવી બેટ્સમેન વિરાટ કોહલી અને રોહિત શર્મા ન્યૂઝીલેન્ડ સામેની ત્રણ મેચની વનડે શ્રેણી પહેલા શુક્રવારે યોજાયેલા પ્રેક્ટિસ સેશનમાં શાનદાર ફોર્મમાં જોવા મળ્યા હતા. ભારતીય ટીમ રવિવારથી ન્યુઝીલેન્ડ સામે ત્રણ મેચની વનડે અને પછી પાંચ મેચની ટી-20 શ્રેણી રમશે. વિજય હજારે ટ્રોફીમાં બે-બે મેચ રમ્યા બાદ કોહલી અને રોહિતે ભારતીય ઝડપી બોલરો, સ્પિનરો અને થ્રો-ડાઉન નિષ્ણાતો સામે લગભગ દોઢ કલાક સુધી બેટિંગ પ્રેક્ટિસ કરી હતી.
સ્થાનિક ક્રિકેટની આ મોટી સ્પર્ધામાં 77 અને 131 રનની ઇનિંગ્સ રમનાર કોહલીએ સ્પિન અને ફાસ્ટ બોલરો બંને સામે આક્રમક બેટિંગ કરી હતી. નેટ્સમાં પિચ પર થ્રો-ડાઉન નિષ્ણાતો સામે બોલના અસમાન ઉછાળાએ પણ સ્ટાર બેટ્સમેનને વધારાનો પડકાર આપ્યો.
ભારતના મુખ્ય મિડલ ઓર્ડર બેટ્સમેન શ્રેયસ અય્યર, વિકેટકીપર-બેટ્સમેન ઋષભ પંત અને ઝડપી બોલર મોહમ્મદ સિરાજ ગુરુવારે વિજય હજારે ટ્રોફીમાં પોતપોતાના રાજ્યની ટીમો માટે રમતા હોવાથી ત્રણ કલાકના લાંબા પ્રેક્ટિસ સેશનનો ભાગ નહોતા. આ ત્રણેય ખેલાડીઓ શુક્રવારે મોડી સાંજે ટીમ સાથે જોડાશે.
ભારતીય કેપ્ટન શુભમન ગિલે પણ પ્રેક્ટિસ સેશનમાં ભાગ લીધો હતો અને નેટ સેશનમાં આસાનીથી બેટિંગ કરી હતી. ગિલ ડિસેમ્બરના અંતમાં અંગૂઠામાં થયેલી ઈજાને કારણે દક્ષિણ આફ્રિકા સામેની છેલ્લી બે T20 ઈન્ટરનેશનલ મેચ રમી શક્યો ન હતો. ટીમે ગુરુવારે કોટંબીના બીસીએ સ્ટેડિયમમાં પ્રેક્ટિસ પણ કરી હતી. આ મેદાન રવિવારે પહેલીવાર પુરૂષોની આંતરરાષ્ટ્રીય મેચનું આયોજન કરશે.
