અમેરિકી રાષ્ટ્રપતિ ડોનાલ્ડ ટ્રમ્પે કહ્યું કે તેમણે ભારત અને પાકિસ્તાન વચ્ચે ચાલી રહેલા યુદ્ધને સમાપ્ત કરવા માટે ટેરિફનો ઉપયોગ કર્યો છે. સુપ્રીમ કોર્ટના નિર્ણય પર તીખી પ્રતિક્રિયા આપતા ટ્રમ્પે કહ્યું કે કોર્ટે તેમની વ્યાપક ટેરિફ નીતિને ગેરબંધારણીય જાહેર કરીને ખોટો નિર્ણય આપ્યો છે. 6-3ની બહુમતીથી સુપ્રીમ કોર્ટે ચુકાદો આપ્યો કે ઇન્ટરનેશનલ ઇમરજન્સી ઇકોનોમિક પાવર્સ એક્ટ (આઇઇઇપીએ) રાષ્ટ્રપતિને ટેરિફ લાદવાની મંજૂરી આપતું નથી. જસ્ટિસ ક્લેરેન્સ થોમસ, સેમ્યુઅલ એલિટો અને બ્રેટ કેવનોએ અસંમતિ દર્શાવી હતી.
ડોનાલ્ડ ટ્રમ્પે એક ન્યૂઝ કોન્ફરન્સમાં જણાવ્યું હતું કે, ‘ટેરિફ્સે મેં ઉકેલેલા 8 યુદ્ધોમાંથી 5નો અંત લાવી દીધો છે, જેમાં ભારત-પાકિસ્તાનના મોટા યુદ્ધનો સમાવેશ થાય છે જે પરમાણુ થઈ શકે છે.’ તેમણે દાવો કર્યો હતો કે પાકિસ્તાનના વડા પ્રધાને તાજેતરમાં કહ્યું હતું કે ટ્રમ્પે 35 મિલિયન (3.5 કરોડ) જીવ બચાવ્યા છે. જો કે, ભારતે હંમેશા ત્રીજા પક્ષની મધ્યસ્થીનો ઇનકાર કર્યો છે અને કહ્યું છે કે બંને દેશોના DGMO વચ્ચે સીધી વાતચીતથી યુદ્ધવિરામ થયો.
સુપ્રીમ કોર્ટના નિર્ણય અંગે શું કહ્યું?
ટ્રમ્પે સુપ્રીમ કોર્ટના નિર્ણયને ખૂબ જ નિરાશાજનક ગણાવ્યો હતો. તેમણે કહ્યું, ‘હું કોર્ટના કેટલાક સભ્યોથી શરમ અનુભવું છું કારણ કે તેઓએ દેશના હિતમાં હિંમત ન દાખવી.’ તેમણે ટેરિફને રાષ્ટ્રીય સુરક્ષાનું એક મહત્વપૂર્ણ સાધન ગણાવ્યું અને દાવો કર્યો કે આ ટેરિફ યુદ્ધને રોકવામાં અસરકારક સાબિત થયા છે. ટ્રમ્પે મે 2025 થી 80 થી વધુ વખત ભારત-પાકિસ્તાન સંઘર્ષને રોકવાનો શ્રેય લીધો છે. તેમણે કહ્યું હતું કે અમેરિકન મધ્યસ્થીથી, બંને પાડોશી દેશો સંપૂર્ણ અને તાત્કાલિક યુદ્ધવિરામ માટે સંમત થયા હતા.
