વડોદરામાં યુવકને ઓફિસમાં બંધક બનાવી ઢોરમાર માર્યાનો વીડિયો વાયરલ થતાં ચકચાર
વડોદરા, વડોદરા શહેરના અકોટા વિસ્તારમાં દિનેશમીલ પાસે આવેલી ઓફિસમાં વેલેન્ટાઈન ડેના રોજ વાઘોડિયાની કોલેજમાં અભ્યાસ કરતા વિદ્યાર્થીએ યુવતીને પ્લાનિંગ કરી ડીનર પર બોલાવી હતી
જે મામલે ઓફિસમાં બંધક બનાવીને યુવતીના ભાઈ સહિતના લોકોએ ભેગા મળીને યુવકને જાણે તાલિબાની સજા આપીને ફટકાર્યો હોવાનો વીડિયો વાયરલ થતાં ચકચાર મચી ગઈ હતી. પોલીસને આ અંગેની જાણ થતાં તાલિબાની સજા આપનારાઓની સામે અટકાયતી ભરીને વધુ કાર્યવાહી હાથ ધરી હતી.
વડોદરા નજીક આવેલીખાનગી યુનિ.માં અભ્યાસ કરતાં યુવકને શહેરના એક યુવતી સાથે મિત્રતા થઈ હતી પછી તેઓ મોબાઈલ પર મેસેજથી વાતો કરતા હતા અને બન્ને વચ્ચે પ્રેમ થયો હતો.
વેલેન્ટાઈન ડેના રોજ યુવકે તેની ગર્લફ્રેન્ડને મેસેજ કરીને ડીનર માટે બોલાવી હતી જેની જાણ યુવતીના ભાઈને થઈ ગઈ હતી. યુવતીનો ભાઈ અને યુવક બન્ને સારા મિત્રો છે જેથી યુવતીના ભાઈએ યુવકને અકોટા પોલીસ સ્ટેશન વિસ્તારમાં આવેલા ઈન્ડિયા બુલ નામના કોમ્પલેક્ષની ઓફિસમાં બોલાવ્યો હતો અને ત્યાં યુવતી પણ હાજર હતી.
યુવતીના ભાઈ સહિત ચારથી પાંચ લોકોએ યુવકને તાલિબાની સજા આપતા હોય એમ ઢોરમાર માર્યો હતો. યુવતીએ પણ યવકને લાફા ઝીંકયા હતા અને તેની વીડિયો પણ ઉતાર્યો હતો અને આ વીડિયો સોશિયલ મીડિયામાં વાયરલ થયો હતો.
વીડિયો વાયરલ થતાં અકોટા પોલીસ એકશનમાં આવી હતી અને ફરિયાદી અને યુવકને માર મારનાર બે યુવકને પોલીસ સ્ટેશનમાં બોલાવવામાં આવ્યા હતા જ્યાં બદનામીના ડરથી યુવકે પોલીસ ફરિયાદ કરવાની ના પાડી દીધી હતી જેથી પોલીસે બે આરોપી સામે અટકાયતી પગલાં ભરી આગળની કાર્યવાહી હાથ ધરી છે.
