માહિતી ખાતાએ તૈયાર કરેલી નવી આવૃત્તિનું કાગધામ મજાદરમાં વિમોચન થયું
આ પુસ્તકમાં ટેકનોલોજીનો સમન્વય:QRકોડ સ્કેન કરી કવિ કાગના કંઠે ગવાયેલી વિવિધ કૃતિઓ સાંભળી શકાશે
પ્રખ્યાત લોકસાહિત્યકાર પદ્મશ્રી કવિ દુલા ભાયા કાગનાં જીવનદર્શન પર આધારિત પુસ્તક‘વાણી તો અમરત વદાં‘નું ૨૩ વર્ષ બાદ અમરેલી જિલ્લાના કાગધામ મજાદર ખાતે સુપ્રસિદ્ધ કથાકાર મોરારી બાપુના હસ્તે પુન:વિમોચન થયું હતું.
રાજ્યનાં માહિતી ખાતાએ તૈયાર કરેલી નવી આવૃત્તિનું કવિ કાગની ૪૯મી પુણ્યતિથિ નિમિત્તે‘કાગના ફળિયે કાગની વાતુ‘કાર્યક્રમના ૨૫માં મણકા નિમિતે અમરેલી જિલ્લામાં આવેલા કાગધામ મજાદરમાં વિમોચન કરવામાં આવ્યુ હતુ.
આ પુસ્તકનું વિમોચન મોરારીબાપુ સાથે શ્રી,વી.એસ. ગઢવી,પુસ્તકના સંપાદકશ્રી,અંબાદાન રોહડીયા,ગુજરાત પ્રેસ અકાદમીના સચિવ શ્રી,જયેશ દવે,શ્રી રામ ભાઈ જામંગની પ્રેરક ઉપસ્થિતિમાં સંપન્ન થયું હતું.
આ પુસ્તકની નવસંવર્ધિત આવૃત્તિના વિમોચન પ્રસંગે પૂર્વ માહિતી નિયામક શ્રી,વસંત ગઢવીએ પુસ્તકના પ્રકાશન પાછળની રસપ્રદ વાત જણાવી હતી. તેમણે કહ્યું કે,પુસ્તકનું પ્રથમવાર વિમોચન તત્કાલીન મુખ્યમંત્રી અને હાલના વડાપ્રધાન શ્રી,નરેન્દ્ર ભાઈ મોદીના હસ્તે કરવામાં આવ્યું હતું. કવિ કાગની ૧૦૦મી જન્મ જયંતી ના અવસરે આ પુસ્તક સાથે એક ટપાલ ટિકિટ અને ડોક્યુમેન્ટરી ફિલ્મનું વિમોચન કરી અને કવિ કાગના સાહિત્ય અને કવિતાના પ્રદાનને “કાવ્યાંજલિ” આપવામાં આવી હતી.
તેમણે ઉમેર્યું કે, ‘વાણી તો અમરત વદાં”ની પ્રતો ઉપલબ્ધ ન હોવાથી અને તેને અત્યાધુનિક ટેકનોલોજી સાથે જોડી અને નવ સંવર્ધિત સંસ્કરણ રજૂ કરવાના હેતુથી પુનઃ વિમોચન કરવામાં આવ્યું છે.
આ પુસ્તકમાં જાણીતા લેખક અને હાસ્ય કલાકાર શ્રી શાહબુદ્દીન રાઠોડ,જાણીતા કવિ અને નિવૃત્ત સનદી અધિકારી શ્રી,ભાગ્યશ જહા,શ્રી,વી.એસ.ગઢવી,શ્રી,લક્ષ્મણ પિંગળશી ગઢવી સહિતના સમર્થ લેખકો દ્વારા લખાયેલા ૪૩ ચેપ્ટરો કાગ સાહિત્ય પ્રેમીઓ માટે ઉપયોગી પુરવાર થશે.
આ પુસ્તકના પુનઃ વિમોચન બદલ મોરારીબાપુ એ અંતઃકરણથી પ્રસન્નતા વ્યક્ત કરી હતી. જ્યારે શ્રી,વી.એસ ગઢવીએ માહિતી કમિશનર શ્રી,કે.એલ. બચાણી અને માહિતી ખાતાનો આભાર વ્યક્ત કર્યો હતો.
આ પ્રસંગે ચારણ સંસ્કૃતિનું દર્શન કરાવતા અંક‘ચારણ સંસ્કૃતિ‘નું પણ વિમોચન કરવામાં આવ્યું હતું. કાર્યક્રમમાં કચ્છથી પધારેલા પ્રોફેસર શ્રી,રમજાન એ કાગ વાણી અને સાહિત્યનું રસપાન કરાવ્યું હતું.
ગુજરાતી લોકસાહિત્યમાં શિરમોર કવિ કાગની પુણ્યતિથિ નિમિત્તે દર વર્ષે તેમના વતન મજાદર(કાગધામ) ખાતે કવિ કાગના જીવનદર્શન ઉપરાંત કાગવાણીના ભક્તિ,શૌર્ય તથા બીજા અનેક વૈવિધ્યસભર અમર કાવ્યોને યાદ કરી કવિકાગને શ્રધ્ધાસુમન અર્પણ કરવાના કાર્યક્રમનુ આયોજન કરવામાં આવે છે.
