નવી દિલ્હીઃ ભારત અને અફઘાનિસ્તાન વચ્ચે અવારનવાર ટી-20 મેચો રમાય છે, પરંતુ ટૂંક સમયમાં અફઘાનિસ્તાન અને ભારતીય ક્રિકેટ ટીમ વચ્ચે ટેસ્ટ અને વનડે શ્રેણી રમાશે. BCCIએ ભારત અને અફઘાનિસ્તાન વચ્ચે યોજાનારી ટેસ્ટ અને ODI શ્રેણીની જાહેરાત કરી છે.
અફઘાનિસ્તાન ક્રિકેટ ટીમ જૂન 2026માં 1 ટેસ્ટ અને ત્રણ વનડે મેચોની શ્રેણી માટે ભારતનો પ્રવાસ કરશે. એકમાત્ર ટેસ્ટ ન્યૂ ચંદીગઢમાં 6 થી 10 જૂન 2026 દરમિયાન રમાશે. ત્રણ મેચની ODI શ્રેણીની પ્રથમ મેચ 14 જૂને ધર્મશાલામાં, બીજી મેચ 17 જૂને લખનૌમાં અને ત્રીજી મેચ 20 જૂને ચેન્નાઈમાં રમાશે. ત્રણેય વનડે બપોરે 1.30 વાગ્યાથી રમાશે.
ભારત અને અફઘાનિસ્તાન વચ્ચે અત્યાર સુધી એકમાત્ર ટેસ્ટ રમાઈ છે. 2018માં બેંગલુરુમાં રમાયેલી આ ટેસ્ટમાં ભારતીય ટીમે એક દાવ અને 262 રનથી જીત મેળવી હતી. 107 રનની ઇનિંગ રમનાર શિખર ધવન પ્લેયર ઓફ ધ મેચ બન્યો હતો. આ મેચમાં ભારતીય ટીમનો કેપ્ટન અજિંક્ય રહાણે હતો.
ભારત અને અફઘાનિસ્તાન વચ્ચે 4 વનડે રમાઈ છે. છેલ્લી ODI 11 ઓક્ટોબર 2023 ના રોજ રમાઈ હતી. 4 ODI મેચોમાંથી, ભારતીય ટીમ 3 જીતી છે. એક મેચ ટાઈ રહી હતી.
T20 વર્લ્ડ કપ 2026માં અફઘાનિસ્તાનની ટીમનું પ્રદર્શન ખૂબ જ નિરાશાજનક રહ્યું હતું.છેલ્લા T20 વર્લ્ડ કપની સેમીફાઈનલ રમનાર અફઘાનિસ્તાન આ વખતે સુપર-8માં પણ જગ્યા બનાવી શક્યું નથી. ટીમને જોનાથન ટ્રોટની જગ્યાએ રિચર્ડ પાયબસના રૂપમાં નવો કોચ પણ મળ્યો છે. વિશ્વકપમાં ખરાબ પ્રદર્શન બાદ અફઘાનિસ્તાનની ટીમ ફરીથી કેવી રીતે પોતાનું નિર્માણ કરે છે તેના પર વિશ્વની અન્ય ટીમો નજર રાખી રહી છે. ભારત સામેના પ્રવાસમાં ટીમને ચોક્કસપણે ફાયદો થશે.
