ભારત અને યુરોપિયન યુનિયન (EU) એ સૂચિત મુક્ત વેપાર કરાર (FTA) માટે સત્તાવાર સ્તરની વાટાઘાટો પૂર્ણ કરી છે. આ કરાર દ્વિ-માર્ગીય વેપારને પ્રોત્સાહન આપશે અને આર્થિક સંબંધોને મજબૂત કરશે. વાણિજ્ય સચિવ રાજેશ અગ્રવાલે સોમવારે આ માહિતી આપી હતી. આ કરાર પર આ વર્ષે હસ્તાક્ષર થવાની અપેક્ષા છે અને તે આવતા વર્ષની શરૂઆતમાં અમલમાં આવી શકે છે.
શું સસ્તું થશે
વાણિજ્ય સચિવે જણાવ્યું હતું કે, ‘સત્તાવાર સ્તરની વાટાઘાટો પૂર્ણ થવાની છે અને બંને પક્ષો 27 જાન્યુઆરી, મંગળવારના રોજ મુક્ત વેપાર કરાર (FTA) વાટાઘાટોના સફળ નિષ્કર્ષની જાહેરાત કરવા માટે તૈયાર છે.’ “વાટાઘાટો સફળતાપૂર્વક પૂર્ણ થઈ ગઈ છે અને સોદો ફાઈનલ થઈ ગયો છે,” વાણિજ્ય સચિવે જણાવ્યું હતું. તેમણે કહ્યું કે હાલમાં ડ્રાફ્ટ કરારની કાનૂની તપાસ ચાલી રહી છે. સરકારનો પ્રયાસ છે કે આ પ્રક્રિયાઓ ઝડપથી પૂર્ણ થાય અને કરાર પર હસ્તાક્ષર કરવામાં આવે.
સમય કેમ લાગશે
આ કરારને અમલમાં લાવવામાં સમય લાગશે, કારણ કે તેને યુરોપિયન સંસદની મંજૂરીની જરૂર છે, જ્યારે ભારતમાં માત્ર કેન્દ્રીય કેબિનેટની સંમતિ જરૂરી છે. 18 વર્ષની લાંબી વાટાઘાટો બાદ આ કરારને અંતિમ સ્વરૂપ આપવામાં આવ્યું છે. મંત્રણા વર્ષ 2007માં શરૂ થઈ હતી. વાટાઘાટો પૂર્ણ થવાની ઔપચારિક જાહેરાત મંગળવારે અહીં યોજાનારી ભારત-ઈયુ સમિટમાં કરવામાં આવશે. વડા પ્રધાન નરેન્દ્ર મોદી 27 જાન્યુઆરીએ યુરોપિયન કમિશનના પ્રમુખ ઉર્સુલા વોન ડેર લેયેન અને યુરોપિયન કાઉન્સિલના પ્રમુખ એન્ટોનિયો કોસ્ટા સાથે શિખર મંત્રણા કરશે.
ભારત અને યુરોપિયન યુનિયન વચ્ચે કેટલો વેપાર
યુરોપિયન યુનિયન ભારતનું મુખ્ય વેપારી ભાગીદાર છે. નાણાકીય વર્ષ 2024-25માં બંને વચ્ચે માલસામાનમાં દ્વિપક્ષીય વેપાર 136.53 બિલિયન યુએસ ડોલર હતો. જેમાં ભારતની નિકાસ 75.85 અબજ યુએસ ડોલર અને આયાત 60.68 અબજ યુએસ ડોલર હતી. વધુમાં, EU ભારતમાં એપ્રિલ 2000 થી સપ્ટેમ્બર 2024 સુધી 117.4 બિલિયન યુએસ ડોલરનું સંચિત વિદેશી ડાયરેક્ટ ઇન્વેસ્ટમેન્ટ (FDI) સાથે એક મુખ્ય રોકાણકાર છે.
સમજૂતી બાદ લક્ઝરી કાર સસ્તી થશે
FTA હેઠળ, ટેરિફ રેટ ક્વોટા પર ભારત અને યુરોપિયન યુનિયન વચ્ચે એક કરાર થશે, જેમાં યુરોપથી ભારતમાં વૈભવી વાહનોની આયાત કરવાનો ક્વોટા વાર્ષિક ધોરણે નક્કી કરવામાં આવશે. આ વાહનોને ઓછી આયાત ડ્યુટી સાથે આયાત કરવાની મંજૂરી આપવામાં આવશે. સૂત્રોનું કહેવું છે કે પ્રથમ તબક્કામાં 15 હજાર યુરો એટલે કે લગભગ 16.3 લાખ રૂપિયાથી વધુની કિંમતની કારને ઓછી આયાત ડ્યૂટી સાથે મર્યાદિત સંખ્યામાં આયાત કરવાની મંજૂરી આપવામાં આવશે. આ સાથે ફોક્સવેગન, ઓડી, મર્સિડીઝ બેન્ઝ અને BMW જેવી યુરોપીયન કાર સસ્તા દરે ભારતીય બજારમાં આવી શકશે.
