મુંબઈઃમરાઠી સિનેમા માટે ખૂબ જ ગર્વની ક્ષણ આવી છે. દિગ્દર્શક સુબોધ ખાનોલકરની ફિલ્મ દશાવતાર ઓસ્કાર 2026ની કન્ટેસ્ટન્સ લિસ્ટમાં સ્થાન મેળવનારી પ્રથમ મરાઠી ફિલ્મ બની છે. આ સિદ્ધિ પ્રાદેશિક ભારતીય સિનેમા માટે સીમાચિહ્નરૂપ સાબિત થઈ રહી છે. આ ફિલ્મમાં પીઢ અભિનેતા દિલીપ પ્રભાવલકરે મુખ્ય ભૂમિકા ભજવી છે, જેમના અભિનયની પહેલાથી જ ઘણી પ્રશંસા કરવામાં આવી છે.
‘દશાવતાર’ પહેલી મરાઠી ફિલ્મ બની
આ ફિલ્મ 12 સપ્ટેમ્બર 2025ના રોજ સિનેમાઘરોમાં રિલીઝ થઈ હતી અને તે 2025ની સૌથી વધુ કમાણી કરનાર મરાઠી ફિલ્મોમાંની એક હતી. ઓછા બજેટ (લગભગ રૂ. 5 કરોડ) પર બનેલી આ ફિલ્મ બોક્સ ઓફિસ પર સુપરહિટ સાબિત થઈ હતી અને લગભગ રૂ. 24 કરોડની કમાણી કરી હતી. આ વાર્તા કોંકણની લોક સંસ્કૃતિ, દશાવતાર લોક નાટક અને ગેરકાયદેસર ખનન જેવા સામાજિક મુદ્દાઓ પર આધારિત છે. તેમાં મહેશ માંજરેકર, ભરત જાધવ, સિદ્ધાર્થ મેનન, પ્રિયદર્શિની ઈન્દલકર, અભિનય બર્ડે જેવા કલાકારો પણ છે.
નિર્દેશક સુબોધ ખાનોલકરે ઈન્સ્ટાગ્રામ પર એકેડેમી તરફથી ઈમેલનો સ્ક્રીનશોટ શેર કરીને આ સારા સમાચારની પુષ્ટિ કરી છે. તેણે લખ્યું કે વર્ષોની મહેનત રંગ લાવી છે અને તે સાબિત કરે છે કે મરાઠી સિનેમા વૈશ્વિક સ્તરે સ્પર્ધા કરી શકે છે. તેણે વધુમાં કહ્યું કે, ‘મુખ્ય શ્રેણીમાં પસંદ થયેલી આ કદાચ પહેલી મરાઠી ફિલ્મ છે. હજારો ફિલ્મોમાંથી પસંદ કરાયેલી 150 થી વધુ ફિલ્મોમાં આ એકમાત્ર મરાઠી ફિલ્મ છે અને એકેડેમી સ્ક્રીનિંગ રૂમમાં બતાવવામાં આવેલી પ્રથમ મરાઠી ફિલ્મ પણ છે.
‘ટીમના સમર્પણ અને વિશ્વાસનું પરિણામ’
પ્રોડક્શન હાઉસ ઝી સ્ટુડિયોએ પણ સોશિયલ મીડિયા પર પોસ્ટ કરીને ઉજવણી કરી. તેણે લખ્યું- ‘લાલ માટીમાંથી જન્મેલા, પરંપરાથી ઉછરેલા, હવે વૈશ્વિક. દશાવતાર ઓસ્કાર તરફ આગળ વધી રહ્યો છે. ઓશન ફિલ્મ કંપનીએ તેને ટીમના સમર્પણ અને વિશ્વાસનું પરિણામ ગણાવ્યું. આ સિદ્ધિ એટલા માટે પણ ખાસ છે કારણ કે દશાવતાર સ્વતંત્ર સબમિશન દ્વારા યાદીમાં આવી છે, જ્યારે શ્રેષ્ઠ આંતરરાષ્ટ્રીય ફીચર શ્રેણીમાં ભારતની સત્તાવાર એન્ટ્રી ‘હોમબાઉન્ડ’ છે.
ઓસ્કાર નોમિનેશન્સ 22 જાન્યુઆરી, 2026 ના રોજ જાહેર કરવામાં આવશે
હવે દશાવતાર આ યાદીમાં સામેલ થનારી બીજી ભારતીય ફિલ્મ છે. ઓસ્કાર નોમિનેશનની જાહેરાત 22 જાન્યુઆરી 2026ના રોજ થશે અને એવોર્ડ સમારોહ 15 માર્ચ 2026ના રોજ થશે. જીતવું કે હારવું એ અલગ બાબત છે, પરંતુ મરાઠી વાર્તાઓ વૈશ્વિક મંચ સુધી પહોંચવી એ પોતાનામાં જ મોટી વાત છે. આનાથી પ્રાદેશિક સિનેમા માટે નવી આશાઓ ઊભી થાય છે કે સારી સામગ્રી ધરાવતી ફિલ્મો ભાષાના અવરોધને તોડી શકે છે. મરાઠી ઈન્ડસ્ટ્રી માટે આ માત્ર શરૂઆત છે.
