ચીનમાં ટાયફૂન ડોલ્ફિનના આગમનને કારણે તબાહીનો ખતરો છે. લગભગ 6000 કિલોમીટર દૂરથી આવેલું આ વાવાઝોડું રવિવારે દેશના પૂર્વી તટ પર ત્રાટક્યું હતું. બેઈજિંગ, ઝેજિયાંગ, જિયાંગસુ, હેનાન અને હેબેઈ સહિત ઘણા વિસ્તારોમાં ભારે વરસાદની ચેતવણી જારી કરવામાં આવી છે. સત્તાવાળાઓએ દરિયાકાંઠાના વિસ્તારોમાંથી લાખો લોકોનું સ્થળાંતર કર્યું છે, જ્યારે રાજ્યના મીડિયા ઝિન્હુઆ અને સીસીટીવી અનુસાર બુધવાર સુધી પૂર, ભૂસ્ખલન અને ભારે પવનની ચેતવણીઓ ચાલુ છે.
સિન્હુઆએ જણાવ્યું હતું કે સોમવારે સવારે 7 વાગ્યા (સ્થાનિક સમય) સુધીમાં, ફુજિયન પ્રાંતમાં જમીન અને સમુદ્ર પરના સંવેદનશીલ વિસ્તારોમાંથી લગભગ 167,900 લોકોને સ્થળાંતર કરવામાં આવ્યા હતા. રવિવારની મોડી રાત સુધીમાં, શાંઘાઈએ જોખમવાળા વિસ્તારોમાંથી લગભગ 2,15,600 લોકોને સલામત સ્થળે ખસેડ્યા હતા. ચીનના રાષ્ટ્રીય હવામાન કેન્દ્ર (NMC) અનુસાર, ડોલ્ફિન આ વર્ષનું 13મું તોફાન છે. તે રવિવારે બે વાર ઝેજિયાંગ પ્રાંત પર ટકરાયું હતું. જોકે અધિકારીઓએ હવે તેને ઉષ્ણકટિબંધીય વાવાઝોડું જાહેર કર્યું છે, ભારે વરસાદ, પૂર અને ભૂસ્ખલનના ભયને કારણે ચેતવણી જારી કરવામાં આવી છે.
બ્લુ ટાયફૂન એલર્ટ જારી
સોમવારે સવારે બ્લુ ટાયફૂન એલર્ટ જારી કરવામાં આવ્યું હતું. જેમાં ઝેજિયાંગ, જિયાંગસુ, હેનાન અને હેબેઈ જેવા વિસ્તારોમાં બુધવાર સુધી સતત ભારે વરસાદની આગાહી કરવામાં આવી છે. સિન્હુઆ અનુસાર, કેટલાક વિસ્તારોમાં મુશળધાર વરસાદ, વાવાઝોડું અને જોરદાર પવન ફૂંકાવાની શક્યતા છે. ચીનના રાજ્ય પ્રસારણકર્તા સીસીટીવીએ જણાવ્યું હતું કે વાવાઝોડું જમીન પર પહોંચતા પહેલા લગભગ 6,000 કિલોમીટરનું લાંબું અંતર કાપી ચૂક્યું હતું. તેની ઉંમર સામાન્ય વાવાઝોડા કરતાં લગભગ ત્રણ ગણી હોવાનું કહેવાય છે, જે તેની અસામાન્ય તીવ્રતા અને લાંબી અસર તરફ નિર્દેશ કરે છે.
વાવાઝોડાને કારણે પૂરનું જોખમ
NMCને ટાંકીને, રાજ્ય મીડિયાએ જણાવ્યું હતું કે ટાયફૂનના અવશેષો ગુરુવારથી ઉત્તર તરફ આગળ વધશે અને ઠંડા પવનો સાથે અથડાશે. આ કારણે બેઇજિંગ, તિયાનજિન, હેબેઇ અને લિયાઓનિંગમાં ભારે વરસાદની સંભાવના છે. હવામાનશાસ્ત્રીઓએ ચેતવણી આપી છે કે આ તોફાન કેટલાક વિસ્તારોમાં પૂર અને અન્ય આફતોનું જોખમ વધારી શકે છે. તેમણે નાના-મધ્યમ કદની નદીઓમાં ભૌગોલિક આફતો અને પૂરને રોકવા માટે મજબૂત સુરક્ષા વ્યવસ્થા અપનાવવાની સલાહ આપી છે. બેઇજિંગ પૂર નિયંત્રણ અધિકારીઓએ જણાવ્યું હતું કે શહેરે મંગળવારે સવારે લેવલ-2 પૂર પ્રતિભાવ સક્રિય કરવાની યોજના બનાવી છે.
આ દેશોમાં પણ વાવાઝોડાની અસર
ડોલ્ફિન ચીન પહોંચે તે પહેલા ફિલિપાઈન્સ, ઉત્તર તાઈવાનના ભાગો અને જાપાનના ઓકિનાવા ટાપુ પર ભારે વરસાદ પડ્યો હતો. દેશની રાષ્ટ્રીય વેધશાળાએ રવિવારે બપોરે ચીનના પૂર્વ કિનારે આવેલા ઝેજિયાંગ પ્રાંતને અથડાવ્યા બાદ ‘રેડ એલર્ટ’ જારી કર્યું હતું. ચીનની ટાયફૂન ચેતવણી પ્રણાલીમાં રેડ એલર્ટ સૌથી ઉચ્ચ સ્તરનું છે. NMCએ જણાવ્યું હતું કે ટાયફૂન ડોલ્ફિન ઝેજિયાંગ પ્રાંતના સનમેનથી ફુજિયન પ્રાંતના ફુડિંગ સુધી દેશના પૂર્વ કિનારે પહોંચી ગયું છે.
