કેન્દ્રીય મંત્રી કીર્તિ વર્ધન સિંહે પાડોશી દેશ બાંગ્લાદેશમાં હિંદુ સમુદાયના લોકો પર થઈ રહેલા હુમલાઓ પર ઊંડી ચિંતા વ્યક્ત કરી છે. વર્તમાન પરિસ્થિતિ પર ચિંતા વ્યક્ત કરતા કેન્દ્રીય વિદેશ રાજ્ય મંત્રી કીર્તિ વર્ધન સિંહે કહ્યું છે કે કેન્દ્ર સરકાર પડોશી દેશમાં હિન્દુઓની સુરક્ષાને લઈને હાઈ કમિશન સાથે સતત વાત કરી રહી છે. આ દરમિયાન તેમણે એમ પણ કહ્યું કે કેન્દ્ર સરકારે બાંગ્લાદેશની સ્થિતિ પર નિયંત્રણ રાખવા બાંગ્લાદેશને ચેતવણી આપી છે.
ગોંડાના સાંસદ કીર્તિવર્ધન સિંહે ગુરુવારે પત્રકારો સાથે વાત કરતા કહ્યું કે ભારત સરકાર બાંગ્લાદેશની ચિંતાજનક સ્થિતિને લઈને ગંભીર છે. તેમણે કહ્યું કે આ અંગે સરકાર હિન્દુઓ પર થતા અત્યાચારને અંકુશમાં લેવા માટે બાંગ્લાદેશમાં હાઈ કમિશન સાથે સતત વાત કરી રહી છે.
ઉલ્લેખનીય છે કે બાંગ્લાદેશમાં હિન્દુ યુવક દીપુ ચંદ્રદાસ દાસની હત્યા બાદ બંને દેશો વચ્ચે તણાવ વધી ગયો છે. મળતી માહિતી મુજબ, 18 ડિસેમ્બરે બાંગ્લાદેશના મૈમનસિંહ જિલ્લાના બાલુકામાં એક ફેક્ટરીમાં કામ કરતા 25 વર્ષીય દીપુ ચંદ્ર દાસને ટોળાએ ઈશનિંદાના આરોપમાં માર મારીને મારી નાખ્યા હતા. ટોળાએ દીપુના શરીરને આગ ચાંપી દીધી હતી. આ ઘટના બાદ ભારતમાં ભારે રોષ જોવા મળ્યો હતો. રાજધાની દિલ્હી અને પશ્ચિમ બંગાળ સહિતના રાજ્યોમાં પણ મોટા પાયે વિરોધ પ્રદર્શન થયા હતા, જ્યાં દીપુની હત્યાના આરોપીઓની ધરપકડ કરવાની માંગ કરવામાં આવી હતી.
દરમિયાન, બાંગ્લાદેશની વચગાળાની સરકારના મુખ્ય સલાહકારના પ્રેસ સચિવ શફીકુલ આલમે બુધવારે જણાવ્યું હતું કે શરીફ ઉસ્માન હાદી અને દીપુ ચંદ્ર દાસની હત્યાની તપાસને સર્વોચ્ચ પ્રાથમિકતા આપવામાં આવશે. દીપુ ચંદ્ર દાસના કેસ પર પત્રકાર પરિષદને સંબોધતા આલમે કહ્યું કે સરકાર આ જઘન્ય હત્યાને ખૂબ જ ગંભીરતાથી લઈ રહી છે. તેમણે કહ્યું કે તમામ ગુનાઓની નિષ્પક્ષ તપાસ અને ઝડપી સુનાવણી સુનિશ્ચિત કરવી એ સરકારની ટોચની પ્રાથમિકતા છે.
