નવી દિલ્હી. ભારતીય મહિલા ક્રિકેટ ટીમને મોટો ઝટકો લાગ્યો છે. ટીમની સ્ટાર સ્પિન બોલર શ્રેયંકા પાટીલ પગની ઘૂંટીમાં ઈજાના કારણે મહિલા T20 વર્લ્ડ કપ 2026માંથી બહાર થઈ ગઈ છે. બુધવારે નેધરલેન્ડ સામે રમાયેલી મેચ દરમિયાન શ્રેયંકાને આ ઈજા થઈ હતી. ઈજાગ્રસ્ત થતાં શ્રેયંકાને સ્ટ્રેચરની મદદથી મેદાનની બહાર લઈ જવી પડી હતી. નેધરલેન્ડ સામે પાવરપ્લેની છેલ્લી ઓવર ફેંકતી વખતે શ્રેયંકાએ તેના પગની ઘૂંટી ખરાબ રીતે વળી ગઈ અને તરત જ મેદાન છોડવું પડ્યું. આ પછી શ્રેયંકા મેચમાં ફરીથી બોલિંગમાં પરત ફરી શકી નહોતી. ‘ક્રિકબઝ’ના રિપોર્ટ અનુસાર, શ્રેયંકાના વર્લ્ડ કપમાંથી બહાર થયા બાદ તેની જગ્યાએ 24 વર્ષની લેગ સ્પિનર પ્રેમા રાવતને ભારતીય ટીમમાં સામેલ કરવામાં આવી છે. પ્રેમાએ વિમેન્સ પ્રીમિયર લીગની છેલ્લી બે સિઝનમાં રોયલ ચેલેન્જર્સ બેંગ્લોર માટે છ મેચ રમી છે. આ દરમિયાન તેણે 3 વિકેટ ઝડપી છે. ડોમેસ્ટિક ક્રિકેટમાં પ્રેમા રાવતે ઉત્તરાખંડમાં સિનિયર ચેમ્પિયનશિપ જીતીને બોલ વડે મહત્વનું યોગદાન આપ્યું હતું. ટી20 વર્લ્ડ કપમાં ભારતીય ટીમનું પ્રદર્શન અત્યાર સુધી શાનદાર રહ્યું છે. પ્રથમ મેચમાં ભારતીય ટીમે પાકિસ્તાનને 64 રને હરાવ્યું હતું. જ્યારે બીજી મેચમાં ટીમે નેધરલેન્ડને 95 રને હરાવ્યું હતું.
નેધરલેન્ડ સામે પ્રથમ બેટિંગ કરવા ઉતરેલી ભારતીય ટીમે 20 ઓવરમાં 5 વિકેટ ગુમાવીને 209 રન બનાવ્યા હતા. ટીમ વતી સ્મૃતિ મંધાનાએ શાનદાર બેટિંગ કરી અને 47 બોલમાં 74 રનની જોરદાર ઈનિંગ રમી. જ્યારે શેફાલી વર્માએ 38 બોલમાં 55 રનનું યોગદાન આપ્યું હતું. બોલિંગમાં ભારત તરફથી શ્રી ચારણીએ 19 રનમાં 4 વિકેટ લીધી હતી જ્યારે શેફાલી વર્માએ 3 વિકેટ લીધી હતી. ભારતીય ટીમ ટૂર્નામેન્ટની તેની આગામી મેચમાં રવિવારે દક્ષિણ આફ્રિકા સામે ટકરાશે.
–IANS
આ પણ વાંચો – અખબાર પહેલા તમારા રાજ્ય/શહેરના સમાચાર વાંચવા માટે ક્લિક કરો.
