(એજન્સી)ગાંધીનગર, રાજ્યમાં વર્ષોથી માત્ર ૨૫૦૦ રૂપિયાના ફિક્સ પગારમાં ફૂલ ટાઇમ કામ કરતા કર્મચારીઓની તરફેણમાં ગુજરાત હાઇકોર્ટ ખુબ અગત્યનો ચુકાદો જાહેર કર્યો છે.
જિલ્લા પંચાયતમાં ફૂલ ટાઇમ ફરજ બજાવતા કોમ્પ્યુટર ઓપરેટર અને ડ્રાઇવરોને વર્ષોથી પાર્ટ ટાઇમ કર્મચારી ગણીને માત્ર ૨૫૦૦ રૂપિયાના ફિક્સ પગારથી રખાતા કર્મચારીઓએ હાઇકોર્ટમાં અરજી કરી હતી. જેમાં સરકારના નાણા વિભાગે તેમને લઘુતમ વેતન આપવા ઇન્કાર કરી દીધો હતો. હાઇકોર્ટે નાણા વિભાગને જૂન સુધીમાં કર્મચારીઓને લઘુતમ વેતન મુજબ ૬ ટકા વ્યાજ સાથે બાકી નીકળતો પગાર ચૂકવી દેવા આદેશ કર્યો છે.
અરજદારો દ્વારા માંગણી કરવામાં આવી હતી કે, રાજ્ય સરકારના ૧૬ જુલાઈ ૨૦૧૯ના પરિપત્ર મુજબ તેમની પોસ્ટના લઘુતમ પગારધોરણનો લાભ આપવામાં આવે. તેમજ જિલ્લા વિકાસ અધિકારીએ ૧૨ ડિસેમ્બર ૨૦૨૨ના અરજદારોના દાવાને નકારતો જે આદેશ રદ કર્યો હતો તે રદ કરવા માંગણી કરવામાં આવી હતી.
અરજદારોનો મુદ્દો એવો હતો કે, તેઓ લાંબા સમયથી ૨૫૦૦ રૂપિયાના નિશ્ચિત પગારે કામ કરે છે અને માત્ર ફિક્સ પગાર પર હોવાને કારણે તેમને લઘુતમ પગારથી વંચિત રાખી શકાય નહીં. સરકારે અગાઉ ૮ કેટેગરી નક્કી કરી હતી અને તે તમામને આ પરિપત્રનો લાભ આપવામાં આવ્યો હતો.
સમગ્ર મામલે હાઇકોર્ટે નોંધ્યું કે, અરજદારોનો કેસ “કેટેગરી-૩”માં આવે છે. જેમાં ૨૯ દિવસની નોકરી અને ૧ દિવસના કૃત્રિમ બ્રેક સાથે કામ કરાવવામાં આવે છે. કાયદા મુજબ આ પ્રથા યોગ્ય નથી અને આવા કર્મચારીઓને પગારના લાભથી વંચિત રાખી શકાય નહીં. તેથી કોર્ટ ૧૨ ડિસેમ્બર ૨૦૨૨નો આદેશ રદ કર્યો. સાથે જ રાજ્યને આદેશ આપ્યો કે અરજદારોને ૧૬ જુલાઈ ૨૦૧૯ના પરિપત્ર મુજબ લાભ આપવામાં આવે.
હાઇકોર્ટે આદેશ કર્યો કે, બાકી રહેલા પગારનો તફાવત ૩૧ મે ૨૦૨૬ સુધી ગણતરી કરીને ૩૦ જૂન ૨૦૨૬ સુધી ચૂકવવાનો રહેશે. ઉપરાંત આ રકમ પર ૬% વ્યાજ પણ આપવાનું રહેશે.
