ઓસ્ટ્રેલિયાની જમણેરી સેનેટર પૌલિન હેન્સને ફરી એકવાર બુરખા વિરુદ્ધ અભિયાન શરૂ કર્યું છે. આ કારણોસર, તેણીએ સોમવારે સંસદમાં સંપૂર્ણ બુરખા (નકાબ સહિત)માં પ્રવેશ કરીને હંગામો મચાવ્યો હતો. તેમનો ઉદ્દેશ્ય જાહેર સ્થળોએ બુરખા અને ચહેરા ઢાંકતા તમામ વસ્ત્રો પર સંપૂર્ણ પ્રતિબંધ લાદવાનો હતો. આ કૃત્ય બાદ મુસ્લિમ સેનેટરોએ ખુલ્લેઆમ તેમના પર જાતિવાદનો આરોપ લગાવ્યો હતો.
હકીકતમાં, સેનેટે હેન્સનના બુરખા પ્રતિબંધ બિલને રજૂ કરવાની મંજૂરી પણ આપી ન હતી. તેના વિરોધમાં તેણે આ બધું કર્યું. આ બીજી વખત છે જ્યારે તેણે સંસદમાં બુરખો પહેર્યો છે. તેણે 2017માં આવું પહેલીવાર કર્યું હતું. તે બુરખો પહેરીને ગૃહમાં પ્રવેશતાં જ હોબાળો મચી ગયો હતો. જ્યારે તેણીએ બુરખો ઉતારવાની ના પાડી ત્યારે સેનેટની કાર્યવાહી થોડા સમય માટે સ્થગિત કરવી પડી હતી.
બુરખા પર કોણે શું કહ્યું?
પૌલિન હેન્સન વિવાદ પર, ન્યૂ સાઉથ વેલ્સની ગ્રીન્સ પાર્ટીના મુસ્લિમ સેનેટર મેહરીન ફારૂકીએ કહ્યું કે તે એક જાતિવાદી સેનેટર છે જે સ્પષ્ટપણે જાતિવાદ દર્શાવે છે. પશ્ચિમ ઓસ્ટ્રેલિયાના સ્વતંત્ર મુસ્લિમ સેનેટર ફાતિમા પૈમાને તેને ‘શરમજનક સ્ટંટ’ ગણાવ્યું છે. શાસક લેબર પાર્ટીના સેનેટ નેતા પેની વોંગ અને વિરોધ પક્ષના ડેપ્યુટી લીડર એન રસ્ટને પણ હેન્સનની આકરી નિંદા કરી હતી. પેની વોંગે કહ્યું કે પૌલિન હેન્સન ઓસ્ટ્રેલિયન સેનેટના સભ્ય બનવા માટે લાયક નથી. તેઓ તેમના સસ્પેન્શનનો પ્રસ્તાવ પણ લાવ્યા હતા.
હેન્સને શું કહ્યું?
ફેસબુક પર પાછળથી જાહેર કરાયેલા એક નિવેદનમાં હેન્સને કહ્યું કે જો સંસદ તેના પર પ્રતિબંધ નહીં મૂકે, તો હું સંસદમાં આ દમનકારી, કટ્ટરપંથી અને અયોગ્ય વસ્ત્રો પહેરવાનું ચાલુ રાખીશ, જેથી દરેક ઓસ્ટ્રેલિયન સમજી શકે કે રાષ્ટ્રીય સુરક્ષા અને મહિલા સ્વતંત્રતા જોખમમાં છે. જો તમને મારો બુરખો ન ગમતો હોય તો તેના પર પ્રતિબંધ લગાવો!
