ટાયફૂન ‘બાવી’ના કારણે મુશળધાર વરસાદ અને ભૂસ્ખલનથી ફિલિપાઈન્સમાં ભારે તબાહી સર્જાઈ છે. દક્ષિણ મિંડાનાઓ ટાપુ પર ભૂસ્ખલનને કારણે ઓછામાં ઓછા 15 લોકોએ જીવ ગુમાવ્યા છે જ્યારે 6 અન્ય લોકો ગુમ છે. હવે આ સુપરસ્ટોર્મ ઝડપથી તાઈવાન, જાપાન અને દક્ષિણ-પૂર્વ ચીન તરફ આગળ વધી રહ્યું છે.
વિશ્વના સૌથી શક્તિશાળી વાવાઝોડામાંના એક ગણાતા ‘બાવી’એ પૂર્વ એશિયાના ઘણા દેશોમાં ભયનો માહોલ ઉભો કર્યો છે. ફિલિપાઈન્સમાં તબાહી મચાવ્યા બાદ હવે આ તોફાન પ્રશાંત મહાસાગર થઈને તાઈવાન તરફ આગળ વધી રહ્યું છે. ખતરાને જોતા પ્રભાવિત દેશોમાં મોટા પાયે બચાવ અને રાહતની તૈયારીઓ શરૂ કરી દેવામાં આવી છે.
તાઇવાન માટે 30 વર્ષમાં સૌથી મોટો ખતરો
હવામાન વિભાગના જણાવ્યા અનુસાર તોફાન બાવીની ત્રિજ્યા લગભગ 1,000 કિલોમીટર છે, જે લગભગ ફ્રાન્સના કદ જેટલી છે. તાઈવાન માટે આ છેલ્લા ત્રણ દાયકાનું સૌથી મોટું તોફાન સાબિત થઈ શકે છે.
તાઈવાનની હવામાન એજન્સીના જણાવ્યા અનુસાર તોફાન દરમિયાન પવનની ઝડપ 190 કિલોમીટર પ્રતિ કલાક સુધી પહોંચી શકે છે. તાઇવાનના ઉત્તરી અને પૂર્વીય ભાગોમાં 1 મીટર (આશરે 39 ઇંચ) સુધીનો મુશળધાર વરસાદ અપેક્ષિત છે, જે પૂર અને ભૂસ્ખલનનું જોખમ વધારે છે. વાવાઝોડાના જોરદાર પવનની રેન્જ 380 કિલોમીટર છે. જેના કારણે દરિયાકાંઠાના વિસ્તારોમાં 9 મીટર ઊંચા મોજા ઉછળવાની શક્યતા છે.
