ચક્રવાતી તોફાન ‘મોન્થા’ મંગળવારે જ દરિયાકાંઠે ત્રાટકશે. હવામાન વિભાગના જણાવ્યા અનુસાર તોફાન આંધ્રપ્રદેશના માછલીપટ્ટનમ અને કલિંગપટનમની વચ્ચે કાકીનાડામાં દરિયાકાંઠે ત્રાટકી શકે છે. હવામાન વિભાગે કહ્યું કે વાવાઝોડાની સૌથી વધુ અસર આંધ્રપ્રદેશમાં જોવા મળશે. આ પછી ચક્રવાતી તોફાન ઓડિશા અને છત્તીસગઢને પણ અસર કરશે. ઓછા દબાણવાળા વિસ્તારો અને ચક્રવાતી વાવાઝોડાની અસર દેશના મોટા ભાગોમાં જોવા મળી રહી છે. યુપીમાં પણ ગાઢ વાદળો છે અને વચ્ચે-વચ્ચે વરસાદ ચાલુ છે.
ચક્રવાત અત્યારે ક્યાં છે
મળતી માહિતી મુજબ, ચક્રવાત મંગળવાર સાંજ સુધીમાં આંધ્રપ્રદેશના દરિયાકાંઠે ટકરાશે અને તેની ઝડપ 90 થી 100 કિમી પ્રતિ કલાકની રહેશે. આ પછી ચક્રવાતની ગતિ ઓછી થશે અને તે ઓડિશા તરફ આગળ વધશે. હવામાન વિભાગે જણાવ્યું કે ચક્રવાત ચેન્નાઈથી 420 કિલોમીટર અને વિશાખાપટ્ટનમથી 500 કિલોમીટર દૂર છે. કાકીનાડાથી તેનું અંતર માત્ર 450 કિલોમીટર છે અને તે 15 કિલોમીટર પ્રતિ કલાકની ઝડપે આગળ વધી રહ્યું છે. આંધ્રપ્રદેશમાં વરસાદ અને ભારે પવન ચાલુ છે. દરિયાકાંઠાના વિસ્તારોને હાઈ એલર્ટ પર રાખવામાં આવ્યા છે.
શાળા-કોલેજો બંધ હતી
હવામાન વિભાગે ચેતવણી આપી છે કે આ વાવાઝોડું ‘ગંભીર ચક્રવાતી તોફાન’માં ફેરવાઈ શકે છે. સોમવારે સવારથી ચેન્નાઈ અને તેની આસપાસના ઉપનગરોમાં સતત વરસાદ પડી રહ્યો છે, જે સાંજે વધુ તીવ્ર બન્યો હતો. થોડા સમય બાદ રાત્રિ દરમિયાન વરસાદનું જોર વધી ગયું હતું. હવામાન વિભાગે ચેન્નાઈ અને તિરુવલ્લુર જિલ્લામાં ભારેથી અતિ ભારે વરસાદની ચેતવણી જારી કરી છે. તેને જોતા બંને જિલ્લા વહીવટીતંત્રે સાવચેતીના પગલારૂપે આવતીકાલે જ શાળાઓમાં રજા જાહેર કરી છે. આ જાહેરાત મોડી રાત્રે કરવામાં આવી હતી.
હવામાન વિભાગે કહ્યું કે કેરળમાં મંગળવારે પણ વરસાદ ચાલુ રહેશે. જ્યારે ચક્રવાતી સિસ્ટમ ચેન્નાઈ નજીક પહોંચશે અને આંધ્ર પ્રદેશ તરફ આગળ વધશે, ત્યારે બપોર અથવા સાંજ સુધીમાં વરસાદની તીવ્રતા ધીમે ધીમે ઘટશે.
દક્ષિણ મધ્ય રેલવેએ પણ ચક્રવાત ‘મોન્થા’ની સંભવિત અસરોને પહોંચી વળવા માટે વ્યાપક તૈયારીઓ કરી છે. જનરલ મેનેજર સંજય કુમાર શ્રીવાસ્તવે પરિસ્થિતિની સમીક્ષા કરીને તમામ વિભાગો-ઓપરેટિંગ, એન્જિનિયરિંગ, ઇલેક્ટ્રિકલ, મિકેનિકલ, કોમર્શિયલ અને મેડિકલ-ને હાઇ એલર્ટ પર મૂક્યા છે. ટ્રેનની કામગીરી, પુલની સ્થિતિ અને પાણીના સ્તર પર સતત દેખરેખ રાખવા માટે કંટ્રોલ રૂમને 24 કલાક કાર્યરત કરવામાં આવ્યા છે. ટ્રેક અને મહત્વના માળખાની તપાસ માટે પેટ્રોલિંગ ટીમો તૈનાત કરવામાં આવી છે.
