અમેરિકાના રાષ્ટ્રપતિ ડોનાલ્ડ ટ્રમ્પે બુધવારે ફરી એકવાર ઈરાનને ઉશ્કેરતું નિવેદન આપ્યું છે. ટ્રમ્પે કહ્યું છે કે એક મોટો યુદ્ધ કાફલો ઈરાન તરફ આગળ વધી રહ્યો છે. તેણે અગાઉ ગયા અઠવાડિયે પણ આવા જ નિવેદન આપ્યા હતા. આ દરમિયાન અમેરિકાના ઘણા યુદ્ધ જહાજો મધ્ય પૂર્વમાં પહોંચી ગયા છે અને એશિયા-પેસિફિક ક્ષેત્રમાં ઈરાન તરફ આગળ વધી રહ્યા છે. અમેરિકી અધિકારીઓના જણાવ્યા અનુસાર એરક્રાફ્ટ કેરિયર યુએસએસ અબ્રાહમ લિંકન અને કેટલાય ગાઈડેડ મિસાઈલ ડિસ્ટ્રોયર અહીં પહોંચ્યા છે અને કોઈપણ સમયે યુદ્ધની આગ ફાટી શકે છે.
એક અમેરિકી અધિકારીએ કહ્યું છે કે આ ક્ષેત્રમાં હવાઈ સંરક્ષણ પ્રણાલીની તૈનાતી પર પણ ટૂંક સમયમાં વિચારણા કરવામાં આવી રહી છે, જેને અમેરિકી લક્ષ્યો પર ઈરાનના કોઈપણ સંભવિત હુમલા સામે રક્ષણ આપવા માટે મહત્વપૂર્ણ માનવામાં આવે છે. ટ્રમ્પે બુધવારે એક સંબોધનમાં કહ્યું હતું કે, અમારી પાસે એક મોટો યુદ્ધ કાફલો છે જે તે દિશામાં જઈ રહ્યો છે. ટ્રમ્પે મંગળવારે પણ કહ્યું હતું કે ઈરાન વાતચીત માટે તૈયાર છે અને સરકાર અમેરિકા સાથે ડીલ કરવા માંગે છે.
આ પહેલા સ્વિત્ઝર્લેન્ડના દાવોસમાં પોતાના ભાષણ બાદ પણ અમેરિકી રાષ્ટ્રપતિએ કહ્યું હતું કે મોટી સેના ઈરાન તરફ આગળ વધી રહી છે. અમેરિકા પરત ફરતાં એરફોર્સ વનમાં સવાર પત્રકારો સાથે વાત કરતાં ટ્રમ્પે કહ્યું હતું કે, “ત્યાં બહુ મોટી ફોર્સ એ દિશામાં જઈ રહી છે. માત્ર સાવચેતી તરીકે. હું કંઈપણ થાય તેવું ઇચ્છતો નથી, પરંતુ અમે તેમના પર ખૂબ નજીકથી નજર રાખી રહ્યા છીએ.”
