વ્હાઇટ હાઉસમાં ઇઝરાયલના વડાપ્રધાન બેન્જામિન નેતન્યાહુ અને અમેરિકી રાષ્ટ્રપતિ ડોનાલ્ડ ટ્રમ્પ વચ્ચેની બેઠક બાદ બીજા દિવસે પશ્ચિમ એશિયામાં તણાવ ફરી ચરમસીમાએ પહોંચી ગયો છે. રાજદ્વારી વાતચીત વચ્ચે અમેરિકાએ ફરી એકવાર ઈરાન પર હવાઈ હુમલા શરૂ કર્યા છે. અમેરિકાના જણાવ્યા અનુસાર, જોર્ડનમાં અમેરિકન સૈન્ય મથક પર ઈરાનના બેલેસ્ટિક મિસાઈલ હુમલાના જવાબમાં આ કાર્યવાહી કરવામાં આવી છે. પહેલેથી જ ચાલી રહેલા તણાવ વચ્ચે, તાજેતરના હુમલાઓએ ચિંતામાં વધારો કર્યો છે.
આ પહેલા બુધવારે અમેરિકી રાષ્ટ્રપતિ ડોનાલ્ડ ટ્રમ્પે ઈઝરાયેલના વડાપ્રધાન બેન્જામિન નેતન્યાહુ સાથે લગભગ દોઢ કલાક સુધી બંધ બારણે વાતચીત કરી હતી. આ મુલાકાત બાદ બંને નેતાઓએ સંબંધોને ખૂબ જ સકારાત્મક ગણાવ્યા હતા. બંને પક્ષોએ નિવેદન જારી કરીને ઈરાન પર એકતાનો સંદેશ પણ આપ્યો હતો. ફેબ્રુઆરીમાં અમેરિકા અને ઈરાન વચ્ચે યુદ્ધ શરૂ થયા બાદ ટ્રમ્પ અને નેતન્યાહુ વચ્ચેની આ પહેલી મુલાકાત હતી.
આ બેઠક પછી તરત જ, ઈરાને જોર્ડનમાં તૈનાત અમેરિકી દળોને નિશાન બનાવીને અનેક બેલેસ્ટિક મિસાઈલો છોડી હતી. જો કે, એવો દાવો કરવામાં આવે છે કે અમેરિકન સંરક્ષણ પ્રણાલીએ તમામ મિસાઇલોને હવામાં તોડી પાડી હતી. તેના જવાબમાં, યુએસ સેન્ટ્રલ કમાન્ડ (સેન્ટકોમ) એ બુધવારે રાત્રે સ્થાનિક સમય મુજબ 8 વાગ્યાથી ઈરાની સૈન્ય મથકો પર ઝડપી હવાઈ હુમલા શરૂ કર્યા.
