ચીને અમેરિકી રાષ્ટ્રપતિ ડોનાલ્ડ ટ્રમ્પના આરોપને સખત રીતે નકારી કાઢ્યો છે કે બેઇજિંગે 2020ની અમેરિકી રાષ્ટ્રપતિની ચૂંટણીમાં હસ્તક્ષેપ કર્યો હતો. ટ્રમ્પે દાવો કર્યો હતો કે ચીને ચૂંટણી સંબંધિત લગભગ 22 કરોડ મતદારોની અંગત માહિતી ધરાવતા રેકોર્ડ ગેરકાયદેસર રીતે મેળવ્યા છે અને ચૂંટણી પ્રક્રિયાને પ્રભાવિત કરવાનો પ્રયાસ કર્યો છે. જોકે, ચીને આ આરોપોને સંપૂર્ણપણે બનાવટી અને દૂષિત ગણાવ્યા હતા. ચીનના વિદેશ મંત્રાલયના પ્રવક્તા લિન જિયાને કહ્યું કે ચીન હંમેશા અન્ય દેશોના આંતરિક મામલામાં દખલ ન કરવાની નીતિનું પાલન કરે છે અને તેણે ક્યારેય અમેરિકાની ચૂંટણીમાં દખલગીરી કરી નથી.
લિન જિયાને અમેરિકા પર વળતો પ્રહાર કરતા કહ્યું કે આખી દુનિયા જાણે છે કે કયો દેશ લાંબા સમયથી અન્ય દેશોની સરકારો, કંપનીઓ અને સામાન્ય નાગરિકો પર નજર રાખે છે. ઉપરાંત, મોટા પાયે વિદેશી નાગરિકોનો ડેટા એકત્રિત કરે છે. તેમણે અમેરિકાને અપીલ કરી કે તે તેના આચરણ પર વિચાર કરે, ચીન પર પાયાવિહોણા આક્ષેપો કરવાનું ટાળે અને ચૂંટણીની રાજનીતિમાં ચીનનો ઉપયોગ કરવાનું બંધ કરે. તેમણે કહ્યું કે અમેરિકાએ બંને દેશો વચ્ચેના સંબંધો સુધારવા માટે સકારાત્મક પગલાં લેવા જોઈએ. ચીને પુનરોચ્ચાર કર્યો કે તે અમેરિકાના ચૂંટણી મુદ્દાઓનો ભાગ બનવા માંગતું નથી અને ન તો તેમાં કોઈ રસ છે.
જિનપિંગ અમેરિકાની મુલાકાતે જવાના છે
આ વિવાદ એવા સમયે સામે આવ્યો છે જ્યારે ચીનના રાષ્ટ્રપતિ શી જિનપિંગની સપ્ટેમ્બરમાં અમેરિકાની પ્રસ્તાવિત મુલાકાતને લઈને ચર્ચાઓ તેજ થઈ રહી છે. ટ્રમ્પે મે મહિનામાં ચીનની મુલાકાત દરમિયાન રાષ્ટ્રપતિ શી સાથે મુલાકાત કરી હતી. તે બેઠક પછી, બંને નેતાઓ સ્થિર આર્થિક અને વેપાર સંબંધો જાળવવા, વિવિધ ક્ષેત્રોમાં વ્યવહારિક સહકાર વધારવા અને પરસ્પર ચિંતાઓને દૂર કરવા સંમત થયા હતા. ટ્રમ્પે બાદમાં જિનપિંગને સપ્ટેમ્બરમાં અમેરિકા આવવાનું આમંત્રણ આપ્યું હતું, જે તેમણે સ્વીકાર્યું હતું. જો કે હવે ટ્રમ્પના તાજેતરના નિવેદન બાદ આ સફરને અસર થાય તેવી સંભાવના છે.
