(એજન્સી)અમદાવાદ, ગુજરાતભરમાં વૈશાખી વાયરા સાથે કાળઝાળ ગરમીથી જનજીવન પર અસર પડી છે. અમદાવાદ અને રાજકોટ સહિત મોટાભાગના શહેરોમાં તાપમાનનો પારો ૪૨થી ૪૩ ડિગ્રી સુધી પહોંચી ગયો છે.
અસહ્ય ગરમીને લીધે બપોરના ટાણે મહાનગરોના રોડ-રસ્તાઓ સુમસામ બની જાય છે. અનિવાર્ય સંજોગોમાં બહાર નીકળતા ટૂ-વ્હિલર ચાલકો મોઢે રૂમાલ, હેલ્મેટ અને ચશ્મા પહેરીને ‘લૂ’ થી બચવા મથામણ કરી રહ્યા છે.
રાજ્યના હવામાન વિભાગે તા. ૨૯ એપ્રિલ સુધી સમગ્ર રાજ્યમાં ભારે ગરમીની આગાહી સાથે ‘યલો એલર્ટ’ જાહેર કર્યું છે. વેસ્ટર્ન ડિસ્ટર્બન્સની અસર ઓછી થતા અને પશ્ચિમી સૂકા પવનો ફૂંકાવાને કારણે વાતાવરણ વધુ શુષ્ક બનશે, જેનાથી લોકોએ હજી વધુ શેકાવું પડશે.
હવામાન વિભાગે સ્પષ્ટ ચેતવણી આપી છે કે, આગામી ૨૪ કલાકમાં તાપમાનમાં હજુ ૨થી ૩ ડિગ્રીનો વધારો થઈ શકે છે. આગામી ૨૬મી એપ્રિલને રવિવારે જ્યારે રાજ્યમાં સ્થાનિક સ્વરાજ્યની ચૂંટણીનું મતદાન થવાનું છે, ત્યારે તાપમાનનો પારો ૪૩ ડિગ્રીને વટાવી જવાની શક્યાતા છે.
રાજ્યના વિવિધ ભાગોમાં ગરમીના પારામાં મોટો ઉછાળો જોવા મળશે. મધ્ય ગુજરાતથી લઈને ઉત્તર ગુજરાત અને સૌરાષ્ટ્ર સુધી આકરા તાપની અસર વર્તાશે. વડોદરા, આણંદ, નડિયાદ અને કપડવંજના વિસ્તારોમાં ભારે ગરમી પડવાની શક્યતા છે. અમદાવાદમાં પણ ગરમીનો પારો આસમાને પહોંચશે. રાજ્યના કેટલાક ભાગોમાં મહત્તમ તાપમાન ૪૩ ડિગ્રી થી ૪૪ ડિગ્રી સુધી પહોંચી શકે છે.
મે મહિનાની શરૂઆતમાં મધ્ય ગુજરાતના કેટલાક વિસ્તારોમાં તાપમાન ૪૫ ડિગ્રીને પણ વટાવી શકે છે. રાજ્યના અન્ય વિસ્તારોમાં પણ સૂર્યદેવનો પ્રકોપ જોવા મળશે. મહીસાગર અને પંચમહાલમાં તાપમાન ૪૨ ડિગ્રી થી ૪૩ ડિગ્રી રહેવાની શક્યતા છે.
ઉત્તર ગુજરાતના પાટણ, સમી, હારીજ, કડી, બેચરાજી, માણસા તેમજ સાબરકાંઠાના હિંમતનગર અને અરવલ્લીમાં તાપમાન ૪૨ ડિગ્રી થી ૪૩ ડિગ્રીની આસપાસ રહેશે. સૌરાષ્ટ્ર અને કચ્છના વિસ્તારોની વાત કરીએ તો રાજકોટમાં પારો ૪૨ ડિગ્રી, જૂનાગઢમાં ૪૧ ડિગ્રી અને કચ્છમાં ૪૧ ડિગ્રીની આસપાસ રહેવાની શક્યતા છે.
અમદાવાદ, રાજકોટ, વડોદરામાં ભીષણ ગરમીનું એલર્ટ અપાયું છે. મોટાભાગના શહેરોમાં ગરમીનો પારો ૪૦ ડિગ્રીને પાર પહોંચ્યો છે, હવામાન વિભાગે રાજ્યમાં સાત દિવસ ભીષણ ગરમીનું યલો એલર્ટ આપ્યું છે.
ગરમીનો પારો ૪૩ ડિગ્રીને પાર પહોંચી શકે છે, અમદાવાદમાં ૨ દિવસમાં તાપમાન ૪૪ ડિગ્રી પર પહોંચે તેવી શક્્યતા હવામાન વિભાગે વ્યક્ત કરી છે. મતદાનના દિવસે અમદાવાદનું મહત્તમ તાપમાન ૪૨થી ૪૩ ડિગ્રી રહેવાની શક્્યતા છે. આકરા તાપના કારણે બપોરના સમયે શહેરના રસ્તાઓ સૂમસામ જોવા મળી રહ્યાં છે ગરમીના કારણે વોટર પાર્ક અને સ્નોપાર્ક હાઉસફૂલ રહે છે.
