કંપનીઓ ઘણીવાર ‘નબળા પ્રદર્શન’ના બહાને કર્મચારીઓને હેરાન કરવા અથવા નોકરીમાંથી કાઢી મૂકવા જેવા પગલાં લે છે. હવે આવા જ એક કેસમાં કર્મચારીએ મોટી જીત મેળવી છે. મામલો સિંગાપોરનો છે. અહીં એક મહિલાને તેની કંપની તરફથી 22 લાખ રૂપિયા (30,000 સિંગાપોર ડોલર)નું વળતર મળ્યું છે. આ મહિલાને કંપનીએ 6 મહિનાના પ્રોબેશન પીરિયડ પછી ‘નબળા પર્ફોર્મન્સ’નું કારણ આપીને કાઢી મુકી હતી. પરંતુ મહિલાએ આ નિર્ણય સામે એમ્પ્લોયમેન્ટ ક્લેમ ટ્રિબ્યુનલ (ECT)નો સંપર્ક કર્યો. ટ્રિબ્યુનલે જણાવ્યું હતું કે કંપનીએ મહિલાને અચાનક અને અન્યાયી રીતે નોકરીમાંથી કાઢી મુકી હતી.
શું છે સમગ્ર મામલો?
મહિલા એપ્રિલ 2025માં કંપનીમાં 6 મહિનાના પ્રોબેશન પર ઓડિટ મેનેજર તરીકે જોડાઈ હતી. પ્રોબેશન પૂરું થયા પછી, કંપનીએ તેમનું કામ સંતોષકારક ન હોવાનું કહીને તેમની નોકરીની પુષ્ટિ કરવાનો ઇનકાર કર્યો હતો. મે અને જૂન 2026માં થયેલી સુનાવણી દરમિયાન મહિલા અને કંપની બંનેએ ટ્રિબ્યુનલમાં પોતપોતાના પક્ષો રજૂ કર્યા હતા. આ કિસ્સામાં, કર્મચારી અને કંપની બંનેની ઓળખ ગુપ્ત રાખવામાં આવી છે.
મહિલાએ કંપની પર શું આરોપ લગાવ્યા?
મહિલાએ દલીલ કરી હતી કે તેને કામ અંગે ક્યારેય ઔપચારિક કે અનૌપચારિક ચેતવણી આપવામાં આવી નથી. તેની પરફોર્મન્સ પેરામીટર્સ પર પરીક્ષણ કરવામાં આવ્યું હતું જે તેની સાથે ક્યારેય શેર કરવામાં આવ્યું ન હતું.
મહિલાએ એવો પણ દાવો કર્યો હતો કે ઓફિસની સત્તાવાર ભાષા અંગ્રેજી હોવા છતાં તેણી કોરિયન બોલતી ન હોવાને કારણે તેની સાથે ભેદભાવ કરવામાં આવ્યો હતો. વધુમાં, કંપનીના આંતરિક ઓડિટ રિપોર્ટિંગ માળખા અંગે પ્રશ્નો ઉઠાવવા બદલ તેમની સાથે અન્યાયી વર્તન કરવામાં આવ્યું હતું. જોકે, પૂરતા પુરાવાના અભાવે ટ્રિબ્યુનલે ભાષાના આધારે ભેદભાવ અને બદલો લેવાના આરોપોને ફગાવી દીધા હતા.
