સેના સાથેના સંબંધોમાં ઉતાર-ચઢાવ હોવા છતાં પણ શરીફ પરિવાર પાકિસ્તાનના રાજકારણમાં પોતાનો પ્રભાવ જાળવી રાખે છે. પૂર્વ પીએમ નવાઝ શરીફના નાના ભાઈ શાહબાઝ શરીફ આજે અહીં વડાપ્રધાન છે, જ્યારે બીજી તરફ તેમની પુત્રી મરિયમ નવાઝ પાકિસ્તાની પંજાબના મુખ્યમંત્રી છે. સતત પાકિસ્તાની સત્તાના કેન્દ્રમાં રહેલો આ પરિવાર છેલ્લા કેટલાક દિવસોથી પાકિસ્તાની લોકોના નિશાના પર છે. તેનું મુખ્ય કારણ પાકિસ્તાને પોતાની વર્ષો જૂની વિદેશ નીતિને બાજુ પર મૂકીને ટ્રમ્પની સૂચના પર ઈઝરાયલની સાથે ઊભું રહેવું છે, તો બીજી તરફ મરિયમનો તેના પુત્રના લગ્ન અને પુત્રવધૂએ ભારતીય ડિઝાઈનર વસ્ત્રો પહેરીને કરવામાં આવેલો મોટો ખર્ચ છે.
પાકિસ્તાની પંજાબ પ્રાંતના મુખ્યમંત્રી મરિયમ નવાઝને પુત્રના બીજા લગ્નમાં ભારે ખર્ચ કરવા બદલ ટીકાઓનો સામનો કરવો પડ્યો હતો. જો કે રાજ્ય સરકારે પણ પોતાના મુખ્યમંત્રીનો બચાવ કર્યો હતો. સરકાર દ્વારા જારી કરવામાં આવેલા નિવેદનમાં કહેવામાં આવ્યું છે કે દરેક વ્યક્તિ પોતાની આર્થિક સ્થિતિ અનુસાર લગ્ન જેવા સમારોહમાં ખર્ચ કરે છે.
મરિયમના પુત્રના શાહી લગ્નને લઈને વિવાદ વધી રહ્યો છે
પાકિસ્તાની સોશિયલ મીડિયા પર મરિયમના પુત્રના બીજા લગ્નને શાહી લગ્ન ગણાવીને તેની મજાક ઉડાવવામાં આવી રહી છે. આ લગ્નમાં પાકિસ્તાનના ફિલ્ડ માર્શલ અસીમ મુનીરથી લઈને પાકિસ્તાનના પૂર્વ વડાપ્રધાન નવાઝ શરીફ સુધીના ઘણા મોટા લોકો સામેલ થયા હતા.
આ લગ્નને લઈને મરિયમના મોંઘા કપડા અને ભારતીય ડિઝાઈનર દ્વારા સિલાઈ કરાયેલા દુલ્હનના કપડાની પણ મજાક ઉડાવવામાં આવી રહી છે.
સોશિયલ મીડિયા પર જારી આ ટીકાઓનો જવાબ આપતા પાકિસ્તાની પંજાબના મંત્રી અજમા બુખારીએ કહ્યું કે આ મામલે મુખ્યમંત્રીને બિનજરૂરી રીતે નિશાન બનાવવામાં આવી રહ્યા છે. તેણે કહ્યું, “લોકો કહે છે કે મરિયમના કપડાને કારણે તેનું ધ્યાન દુલ્હન કરતાં વધુ હતું. આવું એટલા માટે થયું કારણ કે મરિયમ સ્વભાવે ખૂબ જ સુંદર છે. જ્યારે પણ તે જાહેરમાં દેખાય છે ત્યારે લોકો સ્વાભાવિક રીતે જ તેના તરફ આકર્ષિત થાય છે.”
