કોંગ્રેસના સાંસદ અને લોકસભામાં વિરોધ પક્ષના નેતા રાહુલ ગાંધીએ કહ્યું છે કે ભારતીય સેના દેશની માત્ર 10 ટકા વસ્તીના નિયંત્રણમાં છે. તેમણે ઉચ્ચ જાતિના સંદર્ભમાં આ દાવો કર્યો હતો. તેમના આ નિવેદનથી બિહારમાં વિવાદ ઉભો થયો છે. “જો તમે ધ્યાનથી જુઓ તો, દેશની 90 ટકા વસ્તી દલિત, મહાદલિત, પછાત, અત્યંત પછાત અથવા લઘુમતી સમુદાયોની છે. 90 ટકા લોકો સમાજના સૌથી પછાત અને આદિવાસી વર્ગોમાંથી આવે છે,” રાહુલ ગાંધીએ મંગળવારે બિહારના કુટુમ્બામાં એક ચૂંટણી રેલી દરમિયાન જણાવ્યું હતું.
તેમણે વધુમાં કહ્યું, “જો તમે ભારતની 500 સૌથી મોટી કંપનીઓની યાદી જુઓ, તો તમને પછાત અથવા દલિત સમુદાયમાંથી કોઈ નહીં મળે, તે બધા ટોચના 10 ટકામાંથી આવે છે. બધી નોકરીઓ તેમની પાસે જાય છે. તેઓ સશસ્ત્ર દળોને નિયંત્રિત કરે છે. તમને બાકીની 90 ટકા વસ્તીનું ક્યાંય પ્રતિનિધિત્વ જોવા મળશે નહીં.” રાહુલ ગાંધીએ કહ્યું, “અમે એવું ભારત ઈચ્છીએ છીએ જેમાં દેશની 90 ટકા વસ્તી માટે જગ્યા હોય, જ્યાં લોકો સન્માન અને ખુશીથી જીવી શકે. કોંગ્રેસ હંમેશા પછાત લોકો માટે લડતી રહી છે.”
બિહારના લોકોને મજૂર તરીકે ‘ટેગ’ કરવામાં આવ્યા હતા.
કોંગ્રેસના પૂર્વ અધ્યક્ષ ગાંધીએ આરોપ લગાવ્યો કે નીતીશ કુમારના 20 વર્ષના શાસન દરમિયાન બિહારના લોકોને મજૂર તરીકે ટેગ કરવામાં આવ્યા છે. તેમણે કહ્યું કે આજે સ્થિતિ એવી છે કે બિહારના યુવાનોને તેમના રાજ્યમાં રોજગાર નથી મળી શકતો. કોંગ્રેસ નેતા ગાંધીએ કહ્યું કે મહાગઠબંધનની સરકાર કોઈ એક જાતિ કે કોઈ એક ધર્મની નહીં, પરંતુ તમામ જાતિ અને વર્ગોની સરકાર હશે અને ‘બિહારનો અવાજ’ હશે.
ભાજપની આકરી પ્રતિક્રિયા
તેમની ટિપ્પણી પર તીખી પ્રતિક્રિયા આપતા, બીજેપી નેતા સુરેશ નખુઆએ ઈન્ડિયા ટુડેને કહ્યું, “રાહુલ ગાંધી હવે સશસ્ત્ર દળોમાં એક જાતિ શોધી રહ્યા છે અને કહે છે કે 10% લોકો તેને નિયંત્રિત કરે છે. વડાપ્રધાન મોદી પ્રત્યેની તેમની નફરતમાં, તેમણે ભારત પ્રત્યે નફરતની હદ વટાવી દીધી છે.”
