પાકિસ્તાનમાંથી એક મોટા સમાચાર સામે આવ્યા છે. પાકિસ્તાની ટિકટોક સ્ટાર શમસુ બીબી (આયેશા ગિલમાના)ને તક્ષશિલામાં બાઇક પર સવાર બે અજાણ્યા હુમલાખોરોએ ગોળી મારી દીધી હતી. જણાવવામાં આવી રહ્યું છે કે આ ઘટના ત્યારે બની જ્યારે તે પોતાના ભાઈ-બહેન સાથે કારમાં જઈ રહી હતી. અરબ ન્યૂઝના અહેવાલ મુજબ, ગોળીબારમાં શમસુ બીબીનું મોત થયું છે જ્યારે તેની 15 વર્ષની બહેન અસિમા ગંભીર રીતે ઘાયલ છે અને તેની સારવાર ચાલી રહી છે.
પરિવારે શું કહ્યું?
પીડિતાના પિતા, 28 વર્ષીય ફઝલ સાહિબજાદાએ પોલીસમાં ફરિયાદ નોંધાવી અને કહ્યું કે 14 ઓગસ્ટના રોજ તેમની પુત્રીને કાશિફ ઉર્ફે ‘કાશી’ નામના વ્યક્તિનો ફોન આવ્યો, જેણે તેને તાત્કાલિક ઘરની બહાર આવવા કહ્યું. આ પછી શમસુ બીબી, અસીમા અને ભાઈ નઈમતુલ્લા કારમાં બેસી ગયા. બાદમાં સાહિબજાદાને માહિતી મળી કે તેમની પુત્રીને ગોળી વાગી છે અને નાની પુત્રી ઘાયલ થઈ છે. તેઓ THQ હોસ્પિટલ, તક્ષશિલા પહોંચ્યા, જ્યાં તેઓએ શબઘરમાં પુત્રીના મૃતદેહની ઓળખ કરી.
ભાઈ નઈમતુલ્લાના જણાવ્યા અનુસાર, 30-35 વર્ષની વયના બે અજાણ્યા વ્યક્તિઓએ પેટ્રોલ પંપ પાસે બાઇક પરથી તેમની કાર પર ગોળીઓ ચલાવી હતી. શમસુ બીબીના ગળામાં ગોળી વાગી હતી, જેના કારણે તેનું ઘટનાસ્થળે જ મોત થયું હતું. ફાયરિંગને કારણે કારે કાબુ ગુમાવ્યો અને અન્ય વાહન સાથે અથડાઈ, જેના કારણે આસિમા ઘાયલ થઈ ગઈ.
શમસુ બીબી TikTok વીડિયો બનાવતી હતી
સાહિબજાદાએ ફરિયાદમાં કહ્યું છે કે મારી પુત્રી શમસુ બીબી ટિકટોક વીડિયો બનાવતી હતી અને લગભગ ત્રણ-ચાર વર્ષથી આમ કરતી હતી. તેના લગભગ 13 લાખ ફોલોઅર્સ હતા. પરિવારના જણાવ્યા અનુસાર તેમના મૃત્યુ બાદ એકાઉન્ટ નિષ્ક્રિય કરી દેવામાં આવ્યું હતું. ભાઈ રહેમતુલ્લાએ જણાવ્યું કે એકાઉન્ટ પર ત્રણથી સાડા ત્રણ કરોડથી વધુ લાઈક્સ અને 10 લાખથી વધુ ફોલોઅર્સ છે.
રહેમતુલ્લાએ વધુમાં જણાવ્યું કે શમસુ બીબીના કૌસર અને જાવેદ ઉર્ફે શાહીન નામના બે વ્યક્તિઓ સાથે નાણાકીય લેવડ-દેવડ હતી. પૈસા પાછા માંગવા બદલ તેને જાનથી મારી નાખવાની ધમકીઓ મળી હતી, જેની સામે તેણે ઈસ્લામાબાદમાં ફરિયાદ પણ નોંધાવી હતી. સાહિબજાદાએ આક્ષેપ કર્યો હતો કે તેમની પુત્રીની હત્યા આ લોકો દ્વારા અથવા તેમના કહેવાથી અજાણ્યા હુમલાખોરો દ્વારા કરવામાં આવી હતી, જેમાં કાશિફ ઉર્ફે કાશીની પણ ભૂમિકા હોઈ શકે છે, જેથી તેના પૈસા પડાવી શકાય.
