હોંગકોંગના તાઈ પો જિલ્લામાં બુધવારે ત્રણ બહુમાળી રહેણાંક મકાનોમાં ભીષણ આગ ફાટી નીકળી હતી. આ ઘટનામાં ઓછામાં ઓછા ચાર લોકોના મોત થયા છે. કહેવામાં આવી રહ્યું છે કે અન્ય ત્રણ ગંભીર રીતે ઘાયલ થયા છે. ઘાયલોને સ્થાનિક હોસ્પિટલમાં દાખલ કરવામાં આવ્યા છે, જ્યાં તેમની સારવાર ચાલી રહી છે.
રિપોર્ટ અનુસાર, આ દુર્ઘટના હોંગકોંગના ન્યૂ ટેરિટરીઝ વિસ્તારના ઉત્તર-પૂર્વ ભાગમાં થઈ હતી. આગની માહિતી મળતા જ મોટી સંખ્યામાં ફાયર એન્જિન અને ઈમરજન્સી ટીમ ઘટનાસ્થળે પહોંચી ગઈ હતી. ભારે જહેમત બાદ આગ પર કાબુ મેળવ્યો હતો. જો કે આગ લાગવાનું કારણ હજુ સુધી જાણી શકાયું નથી.
ધ ન્યૂ યોર્ક ટાઈમ્સે હોંગકોંગના સરકારી રેડિયો ટેલિવિઝન હોંગ કોંગ (RTHK) ને ટાંકીને જણાવ્યું હતું કે ઘાયલોમાંથી બેની હાલત ગંભીર છે, જ્યારે એક વ્યક્તિની સ્થિતિ સ્થિર હોવાનું જાણવા મળ્યું છે. ઘટના સ્થળેથી મેળવેલા વિડીયો ફૂટેજમાં અનેક માળેથી ઉછળતી વિશાળ જ્વાળાઓ અને ગાઢ કાળો ધુમાડો આકાશને ઢાંકી દેતો સ્પષ્ટ દેખાઈ રહ્યો હતો.
ન્યૂયોર્ક ટાઈમ્સ અનુસાર, અસરગ્રસ્ત ઈમારતો વાંસના પાલખથી ઢંકાયેલી હતી, જેનો ઉપયોગ સામાન્ય રીતે હોંગકોંગમાં બાંધકામ અને નવીનીકરણના કામમાં થાય છે. આ વાંસ પાલખ મેટલ પાલખ કરતાં વધુ જ્વલનશીલ છે, તેથી આગ ઝડપથી ફેલાય છે. હાલ ફાયર વિભાગે એલર્ટ જાહેર કર્યું છે. રાહત અને બચાવ કામગીરી ચાલી રહી છે.
