ન્યૂઝીલેન્ડે રવિવારે T20 વર્લ્ડ કપની પોતાની પ્રથમ મેચમાં અફઘાનિસ્તાનને 5 વિકેટે હરાવ્યું હતું. પ્રથમ બેટિંગ કરતા અફઘાનિસ્તાને 20 ઓવરમાં 6 વિકેટ ગુમાવીને 182 રન બનાવ્યા હતા. આ લક્ષ્યાંક હાંસલ કરવા માટે ન્યુઝીલેન્ડે અફઘાનિસ્તાન સામે વર્લ્ડ રેકોર્ડનો પીછો કરવો પડ્યો હતો. ન્યૂઝીલેન્ડની ટીમે અફઘાનિસ્તાન સામે સૌથી મોટા ટોટલનો પીછો કરવાનો શ્રીલંકાના રેકોર્ડને તોડી નાખ્યો છે. 183 રનના લક્ષ્યાંકનો પીછો કરવા ઉતરેલી ન્યૂઝીલેન્ડે 13 બોલ બાકી રહેતા મેચ જીતી લીધી હતી. ન્યૂઝીલેન્ડે 17.5 ઓવરમાં 5 વિકેટ ગુમાવીને 183 રન બનાવ્યા હતા.
અફઘાનિસ્તાને ન્યૂઝીલેન્ડ સામે 183 રનનો ટાર્ગેટ આપ્યો હતો. આ હાંસલ કરવા માટે ન્યૂઝીલેન્ડે શ્રીલંકાના રેકોર્ડને તોડવો પડ્યો હતો, જે તેણે 2022માં અફઘાનિસ્તાન સામે હાંસલ કર્યો હતો. શ્રીલંકાની ટીમે 2022માં અફઘાનિસ્તાન સામે શાહજહાંમાં સૌથી મોટા લક્ષ્યનો પીછો કરતા વિજય હાંસલ કર્યો હતો. શ્રીલંકાએ 176 રન બનાવ્યા હતા. જો કે રવિવારે ચેન્નાઈમાં રમાયેલી T20 વર્લ્ડ કપની મેચમાં ન્યૂઝીલેન્ડે 183 રનનો લક્ષ્યાંક હાંસલ કરીને આ રેકોર્ડ બનાવ્યો હતો.
અફઘાનિસ્તાનના 183 રનના લક્ષ્યાંકનો પીછો કરતા ન્યૂઝીલેન્ડે ઓપનર અને વિકેટકીપર સેફર્ટની 42 બોલમાં ત્રણ છગ્ગા અને સાત ચોગ્ગાની મદદથી 65 રનની ઈનિંગને કારણે 17.5 ઓવરમાં પાંચ વિકેટે 183 રન બનાવીને આસાન વિજય નોંધાવ્યો હતો. સેફર્ટે ગ્લેન ફિલિપ્સ (42 રન, 25 બોલ, સાત ચોગ્ગા, એક છગ્ગો) સાથે ત્રીજી વિકેટ માટે 47 બોલમાં 74 રનની ભાગીદારી પણ કરી હતી, જેના કારણે ન્યુઝીલેન્ડની ટીમ બીજી ઓવરમાં 14 રનમાં બે વિકેટ ગુમાવ્યા બાદ પુનરાગમન કરવામાં સફળ રહી હતી.
અફઘાનિસ્તાને અનુભવી ગુલબદ્દીન નાયબ (63 રન, 35 બોલ, ચાર છગ્ગા, ત્રણ ચોગ્ગા)ની શાનદાર અડધી સદી અને સેદીકુલ્લાહ અટલ (29 રન, 24 બોલ) વચ્ચે ત્રીજી વિકેટ માટે 51 બોલમાં 79 રનની ભાગીદારીથી છ વિકેટે 182 રન બનાવ્યા હતા. ન્યૂઝીલેન્ડ તરફથી લોકી ફર્ગ્યુસન સૌથી સફળ બોલર રહ્યો હતો, જેણે 40 રનમાં બે વિકેટ લીધી હતી.
