મુંબઈ, 19 ફેબ્રુઆરી નેશનલ હાઈવે ઓથોરિટી ઓફ ઈન્ડિયા (NHAI) દ્વારા NCC લિમિટેડ અને તેની પેટા કંપની પર બે વર્ષ માટે પ્રતિબંધ (Debarment) લાદવામાં આવતા ગુરુવારે ઇન્ટ્રા-ડે ટ્રેડિંગ દરમિયાન કંપનીના શેરમાં લગભગ 10 ટકાનો ઘટાડો જોવા મળ્યો હતો.
શેરબજારમાં આ તીવ્ર ઘટાડાને કારણે સ્ટોક છેલ્લા એક વર્ષના સૌથી નીચલા સ્તરે પહોંચી ગયો હતો. નેશનલ સ્ટોક એક્સચેન્જ (NSE) પર શેર 9.85 ટકા ઘટીને ₹135 પર આવી ગયો હતો, જે તેની 52-અઠવાડિયાની નવી નીચી સપાટી છે.
કંપનીએ એક્સચેન્જ ફાઇલિંગમાં જણાવ્યું હતું કે, તેની સ્ટેપ-ડાઉન પેટા કંપની OB ઇન્ફ્રાસ્ટ્રક્ચર લિમિટેડ (OBIL) અને NCC લિમિટેડ બંનેને NHAI દ્વારા બે વર્ષ માટે પ્રતિબંધિત કરવામાં આવ્યા છે. આ આદેશ મુજબ, બંને કંપનીઓ હવે NHAI દ્વારા બહાર પાડવામાં આવતા કોઈપણ ટેન્ડર, બિડ અથવા પ્રપોઝલમાં ભાગ લઈ શકશે નહીં. આ પ્રતિબંધ 17 ફેબ્રુઆરી, 2026 થી અમલમાં આવ્યો છે.
આ પ્રતિબંધ ઉત્તર પ્રદેશના એક હાઈવે પ્રોજેક્ટ સાથે જોડાયેલો છે, જે OBIL દ્વારા 2006ના ‘બિલ્ડ-ઓપરેટ-ટ્રાન્સફર’ (BOT) કરાર હેઠળ અમલમાં મૂકવામાં આવ્યો હતો.
NCC લિમિટેડે સ્પષ્ટ કર્યું છે કે તેના હાલના ઓર્ડર અને ચાલુ પ્રોજેક્ટ્સ પર તાત્કાલિક કોઈ નાણાકીય કે ઓપરેશનલ અસર પડશે નહીં. જોકે, કંપનીએ સ્વીકાર્યું છે કે ભવિષ્યના ટેન્ડરો પર પડનારી અસરનો અંદાજ અત્યારે લગાવી શકાય તેમ નથી, કારણ કે આ પ્રતિબંધ બે વર્ષ સુધી NHAI ના નવા પ્રોજેક્ટ્સમાં ભાગ લેતા અટકાવશે.
