અમેરિકી રાષ્ટ્રપતિ ડોનાલ્ડ ટ્રમ્પે ઈરાનને હોર્મુઝ સ્ટ્રેટ ખોલવા માટે મંગળવાર સાંજની સમયમર્યાદા નક્કી કરી છે. ટ્રમ્પે કહ્યું છે કે ઈરાન પાસે મંગળવાર સાંજ સુધી હોર્મુઝ સ્ટ્રેટ ખોલવા અથવા તેના નિર્ણાયક ઈન્ફ્રાસ્ટ્રક્ચર પર હુમલાનો સામનો કરવાનો સમય છે. તેમણે રવિવારે ‘વોલ સ્ટ્રીટ જર્નલ’ને આપેલા ઈન્ટરવ્યુમાં આ માહિતી આપી હતી. જો કે આ ધમકીની ઈરાન પર કોઈ અસર થાય તેવું લાગતું નથી. તેના બદલે તેણે હોર્મુઝ માર્ગ ખોલવાની શરત રાખી છે.
ટ્રમ્પનું અલ્ટીમેટમ
ટ્રમ્પે કહ્યું કે, જો તેઓ મંગળવાર સાંજ સુધી કંઈ નહીં કરે તો તેમની પાસે ન તો કોઈ પાવર પ્લાન્ટ બચશે કે ન તો કોઈ પુલ સુરક્ષિત રહેશે. ટ્રમ્પે પાછળથી સોશિયલ મીડિયા પર એક પોસ્ટ શેર કરી, જેમાં વધુ વિગતો વિના લખ્યું, “મંગળવાર, 8:00 p.m. ઇસ્ટર્ન ટાઇમ.” (ભારતીય સમય મુજબ બુધવારે સવારે)
આ પહેલા રવિવારે અન્ય એક પોસ્ટમાં ટ્રમ્પે ઈન્ફ્રાસ્ટ્રક્ચર પર હુમલાની ચેતવણી આપી હતી, પરંતુ તેમણે કોઈ ચોક્કસ સમયનો ઉલ્લેખ કર્યો ન હતો. હવે તેણે મંગળવારે રાત્રે 8 વાગ્યાનો સમય નક્કી કર્યો છે.
ઈરાનના પાવર પ્લાન્ટ અને પુલ પર હુમલા થશે
ઈન્ટરવ્યુ પહેલા ટ્રુથ સોશિયલ પર એક પોસ્ટમાં ટ્રમ્પે ઈરાનને વાંધાજનક શબ્દોનો ઉપયોગ કરીને કડક ચેતવણી આપી હતી. તેણે કહ્યું હતું કે જો હોર્મુઝ સ્ટ્રેટને ખોલવામાં નહીં આવે તો અમેરિકા ઈરાનના પાવર પ્લાન્ટ્સ અને પુલો પર હુમલો કરશે. ટ્રમ્પે લખ્યું, મંગળવારે ઈરાનમાં પાવર પ્લાન્ટ ડે અને બ્રિજ ડે હશે, બંને એક જ દિવસે હશે. આ પહેલા ક્યારેય જોવામાં આવ્યું ન હોત. ખૂબ જ કઠોર અને વાંધાજનક ભાષાનો ઉપયોગ કરીને, ટ્રમ્પે આગળ લખ્યું: જળમાર્ગો ખોલો નહીંતર તમે નરકમાં જશો – બસ જોતા રહો!
શનિવારે ટ્રમ્પે તેહરાનને તેનું 10 દિવસનું અલ્ટીમેટમ યાદ અપાવ્યું હતું. તેમણે કહ્યું કે ઈરાન પાસે ડીલ પર પહોંચવા અથવા વ્યૂહાત્મક સ્ટ્રેટ ઓફ હોર્મુઝને ફરીથી ખોલવા માટે 48 કલાકનો સમય છે.
