ઈરાનના બેજવાબદાર હુમલાને લઈને ઓમાન ગુસ્સે છે. રવિવારે ઓમાન સરકારે ઈરાનના રાજદૂતને બોલાવીને વિરોધ નોંધાવ્યો હતો. ઓમાનની સરકારી સમાચાર એજન્સીએ સોશિયલ મીડિયા પર જાહેર કરેલા એક નિવેદનમાં જણાવ્યું હતું કે, ઓમાન આ બેજવાબદારીભર્યા કાર્યો પર ઊંડી ચિંતા અને દુ:ખ વ્યક્ત કરે છે. અમે પ્રાદેશિક સાર્વભૌમત્વ, સારા પડોશી સંબંધો અને અન્ય દેશોની આંતરિક બાબતોમાં બિન-દખલગીરીના સિદ્ધાંતોનું કડક પાલન કરવાની અપીલ કરીએ છીએ. ઓમાન દ્વારા હોર્મુઝ પર વાતચીત માટે ઈરાનના વિદેશ મંત્રીની યજમાનીના એક દિવસ બાદ આ નિવેદન આવ્યું છે.
અમેરિકા-ઈરાન તણાવ ચરમ પર
આ દરમિયાન હોર્મુઝને લઈને અમેરિકા અને ઈરાન વચ્ચેના તણાવે નવું સ્વરૂપ લીધું છે. રવિવારે બંને દેશોએ એકબીજા પર નવા હુમલાનો દાવો કર્યો હતો. યુ.એસ.એ ઈરાની સૈન્ય લક્ષ્યો પર મોટા પાયે હુમલાઓ શરૂ કર્યા, જ્યારે ઈરાને ગલ્ફ પ્રદેશમાં યુએસ લક્ષ્યો પર જવાબી હુમલાઓ અને હોર્મુઝને કામચલાઉ બંધ કરવાની જાહેરાત કરી. ગયા મહિને જાહેર કરાયેલ યુદ્ધવિરામ ભંગ થયા બાદ આ અથડામણને બંને પક્ષો વચ્ચેની સૌથી તીવ્ર સૈન્ય કાર્યવાહી માનવામાં આવે છે. અમેરિકી રાષ્ટ્રપતિ ડોનાલ્ડ ટ્રમ્પે આરોપ લગાવ્યો છે કે ઈરાને જળમાર્ગ પરથી પસાર થતા કોમર્શિયલ જહાજો પર ફરી હુમલો કરવાનું શરૂ કરી દીધું છે.
અમેરિકાએ શું કહ્યું?
યુએસ સેન્ટ્રલ કમાન્ડ (સેન્ટકોમ) એ જણાવ્યું કે શનિવારે અમેરિકી દળોએ ઈરાનમાં લગભગ 140 સૈન્ય લક્ષ્યોને નિશાન બનાવ્યા. આ અઠવાડિયે આ ત્રીજું મોટું ઓપરેશન છે, જેમાં ત્રણ રાતમાં કુલ 300થી વધુ ટાર્ગેટ પર હુમલો કરવામાં આવ્યો છે. હુમલાઓમાં મિસાઇલ અને ડ્રોન બેઝ, નેવલ બેઝ, દારૂગોળો સ્ટોર્સ, કોમ્યુનિકેશન નેટવર્ક્સ અને કોસ્ટલ સર્વેલન્સ સેન્ટરનો સમાવેશ થાય છે. CENTCOM અનુસાર, સાયપ્રસ-ધ્વજવાળા કન્ટેનર જહાજ M/V GFS Galaxy પર ઈરાનના ઈસ્લામિક રિવોલ્યુશનરી ગાર્ડ કોર્પ્સ (IRGC) દ્વારા કરવામાં આવેલા હુમલાના જવાબમાં આ કાર્યવાહી કરવામાં આવી હતી.
યુએસ સેનાએ દાવો કર્યો હતો કે જહાજના એન્જિન રૂમને ગંભીર નુકસાન થયું છે અને એક ક્રૂ મેમ્બર ગુમ છે. જો કે, આંતરરાષ્ટ્રીય જળમાર્ગો પર વ્યાપારી શિપિંગ ચાલુ રહે છે. યુનાઇટેડ કિંગડમ મેરીટાઇમ ટ્રેડ ઓપરેશન્સ (યુકેએમટીઓ) એ અહેવાલ આપ્યો હતો કે ક્રૂએ આગ પછી જહાજ છોડી દીધું હતું અને લાઇફબોટ દ્વારા બચાવી લેવામાં આવ્યું હતું.
