અમરેલી જિલ્લાના મોટા આંકડિયા ગામે લગ્નપ્રસંગ જેમ ઢોલ-શરણાઈ સાથે મત આપવા નીકળ્યા ગ્રામજનો
(એજન્સી)અમરેલી, હાલ લોકશાહીના મહાપર્વ નિમિત્તે સ્થાનિક સ્વરાજની ચૂંટણીમાં આજે ૨૬મી એપ્રિલે આખા ગુજરાતમાં મતદાનની પ્રક્રિયા ચાલી રહી હતી ત્યારે અમરેલી જિલ્લાના મોટા આંકડિયા ગામે એક અત્યંત પ્રેરણાદાયક અને અનોખો નજારો રજૂ કર્યો છે.
સામાન્ય રીતે ચૂંટણી એટલે વ્યૂહરચના અને રાજકીય ગરમાવો માનવામાં આવે છે, પરંતુ મોટા આંકડિયાના ગ્રામજનોએ તેને ખરા અર્થમાં લોકશાહીના પર્વની અનોખી ઉજવણી તરીકે સ્થાપિત કરી છે.
ગામમાં વહેલી સવારથી જ વાતાવરણ કોઈ લગ્નપ્રસંગ કે મોટા મહોત્સવ જેવું જ સર્જાયું હતું. આ અનોખી ઉજવણીની વિશેષતા એ હતી કે મતદારો માત્ર મતદાન મથક સુધી ચાલીને જવાને બદલે ઢોલ અને શરણાઈના તાલે મધુર સૂરો વચ્ચે મતદાન કરવા નીકળ્યા હતા.
ઢોલના ધબકારે ગ્રામજનોમાં એક નવો જ જોશ ભરી દીધો હતો અને દરેકના મુખ પર લોકશાહીના આ પર્વ માટેનો ગર્વ જોવા મળતો હતો. શરણાઈના મંગલ સૂર વચ્ચે જ્યારે ગ્રામજનો સમૂહમાં મતદાન કરવા નીકળ્યા હતા, ત્યારે રસ્તામાં ઊભેલા અન્ય લોકો પણ આ અનેરા ઉત્સાહમાં જોડાયા વગર રહી શક્્યા નહોતા.
આ પવિત્ર અવસરમાં સ્થાનિક નેતૃત્વએ પણ સક્રિય અને પ્રેરણાદાયી ભૂમિકા ભજવી હતી. ભાજપના અગ્રણી નેતા શૈલેષ પરમાર પણ આ લોકશાહીના ઉત્સવમાં સહભાગી થયા હતા. ખાસ વાત એ હતી કે તેઓ માત્ર એકલા નહીં, પરંતુ પોતાના સમગ્ર પરિવાર સાથે મતદાન કરવા માટે ઉમટી પડ્યા હતા. નેતા શૈલેષ પરમારે ગ્રામજનોની સાથે ખભેખભા મિલાવીને લોકશાહીની મજબૂતી માટે પોતાનો મતાધિકાર ઉપયોગ કર્યો હતો.
તેમની ઉપસ્થિતિ અને ગ્રામજનો સાથેની તેમની આત્મીયતાએ આ પ્રસંગને વધુ ભવ્ય બનાવ્યો હતો. મોટા આંકડિયા ગામમાં જોવા મળેલો આ ઉત્સાહ એ વાતની સાક્ષી પૂરે છે કે ગ્રામીણ જનતા પોતાની મતાધિકારની શક્તિને અને તેની ગરિમાને ખૂબ જ સારી રીતે સમજે છે. યુવાનોમાં પ્રથમ વખત મતદાન કરવાનો થનગનાટ હતો, તો વડીલો પણ આ પર્વમાં ઉત્સાહપૂર્વક જોડાયા હતા.
ગામના ચોરે અને શેરીઓમાં માત્ર મતદાનની જ ચર્ચાઓ સંભળાતી હતી. અમરેલી જિલ્લાનું આ ગામ આજે સમગ્ર પંથકમાં પ્રેરણાનું કેન્દ્ર બન્યું છે. લોકશાહીના આ પર્વને જે રીતે હર્ષોલ્લાસ અને સંગીતના સૂરો સાથે ઉજવવામાં આવ્યો, તેનાથી સ્પષ્ટ થાય છે કે અહીંના લોકો માટે મતદાન એ માત્ર એક રાજકીય ફરજ નથી, પરંતુ રાષ્ટ્ર પ્રત્યેનો એક ઉત્સવ છે. ઢોલ-શરણાઈના અવાજ અને મતદારોના હસતા ચહેરાઓએ મોટા આંકડિયાના આ દિવસને ઐતિહાસિક બનાવી દીધો છે.
